عمران خان تون ہیت مفک، حکومت مذاکرات آن نمن

لاہور : حکومت پاکستان تحریک انصاف نا چیئرمین عمران خان ناکنڈآن مذاکرات نا سلہ ءِ مسترد کرینے۔ لاہور اٹ جناح ہاؤس نا دورہ غان گڈ میڈیا تون ہیت وگپ کرسا بنجائی وزیر سعد رفیق پارے کہ جناح ہاؤس اٹ بھاز است کروک واقعہ پیش بس‘ بلکہ دا سانحہ اسے‘ جناح ہاؤس اٹ قائداعظم نا بھاز آ گڑاک ساڑی ئسر‘ ظالم آک جناح ہاؤس اٹ ہر گڑاءِ خاخر تسر‘ ہچ شکی متوس‘ جناح ہاؤس نا تقدس ءِ لتاڑ کننگا۔او پارے کہ ننا اسٹیبلشمنٹ تون اختلاف مسنے وخت اس ہم فوجی ملکیت آتا مون آ برانز نا خیال بتنے‘ مشرف دور اٹ ہڑدے برانز کرینہ ولے کنٹونمنٹس نا تقدس نا خیال ءِ تخانہ۔ 9 مئی آ پی ٹی آئی نا سرکڑدہ غاک جناح ہاؤس آن پیشن و ٹکٹ ہولڈر آک تہٹی ئسر‘ جناح ہاؤس اٹ خاخر ءِ پٹرول یا باکس اٹ آخا بلکہ کیمیکل نا کمک اٹ خلنگاسس‘ اوپارے کہ ہرا بندغ آک تینا فوج ءِ ٹارگٹ کیر اوفتیان زیات بدبخت پین کس اف‘ جی ایچ کیو و کور کمانڈر آ جلہو سیاست آخا بلکہ دہشت گرد آتا کاریم ءِ‘ نن کوشست کننگ اٹی ان کہ بے گناہ تے سزا رسینگپ و گناہ گار تے بشخنگپ۔ خواجہ سعد رفیق پارے کہ ہیت وگپ انا چاگڑد و ایجنڈا اس مریک ولے دا چاگڑد مذاکرات کن اف‘ عمران خان ہرا کمیٹی ءِ ٹہفینے اوڑتون مذاکرات دیر کیک۔ اسہ سوج اسے ناورندی ٹی او پارے کہ 9 مئی نا واقعہ غاتے توننگ دنا زمواری ئس دا سوج ءِ کنے آن آخا پنجاب نا نگران حکومت آن کننگے۔ ایلو کنڈآ جیو نیوز نا پروگرام جرگہ ٹی ہیت کرسا وزیر خزانہ اسحاق ڈار پارے کہ عمران خان تون مذاکرات داسہ بیرہ ہمو وخت آ مننگ کیک ہراتم او قوم آن بشخنداری کے‘تینا ردینک آتے امنا کے و قول کے کہ داکان پد دن ہچ کپک ہرا وڑ کہ 9 مئی آ مس۔ اوپارے کہ حکومت پی ٹی آئی تون است انا سِخت اٹ مذاکرات کرے‘ گچین کاری تا تاریخ آن بیدس ایلو کل ہیت آتیا پی ٹی آئی ءِ راضی کرے ولے ولدا او 9 مئی آ انت کریر۔ یات سلے کہ تدوک آ دے پاکستان تحریک انصاف (پی ٹی آئی) نا چیئرمین عمران خان حکومت تون مذاکرات کن 7 باسکی کمیٹی نا پڑو کریسس۔ شاہ محمود قریشی، پرویز خٹک، اسد قیصر،حلیم عادل شیخ، عون عباس، مراد سعید و حماد اظہر مذاکراتی ٹیم انابشخ مریرہ۔مسکوہی وزیراعظم نواز شریف ہم عمران خان تون ہر وڑ انا مذاکرات کننگ آن نمن مسوسس۔

(مانیٹرنگ ڈیسک)