معافی خواہنگ اسکان عمران خان تون ہیت مفک، شہباز شریف

اسلام آباد : وزیراعظم شہباز شریف پارینے کہ ای بے خلیس آن پاوہ کہ عمران نیازی تاریخ نا کل آن بھلا فراڈیا ءِ‘ عدالت عظمی نا اِرا شرفدار جج انا فیصلہ بس دا فیصلہ ءِ جسٹس منصور علی شاہ و جسٹس جمال شاہ مندوخیل جاری کریر‘اوپارے کہ دا باندات آتے ٹی ہرا فیصلہ بس او فور تھری اٹی ءِ‘ عمران نیازی آئی ایم ایف تون معاہدہ کرے و ولدا اونا خلاف ورزی ءِ کرے‘ پاکستان ءِ ڈیفالٹ نا دنگ آسر کرے‘ پی ٹی آئی نا ٹرولز آک ننا فوج انا لیڈرشپ آ ہراوڑ بہتان خلنگ اٹی ءُ دانا کس اس سجفنگ ہم کتوکہ‘ اونا دور اٹ اپوزیشن نا اسہ بندغ اس دن ءُ ہیت کریکہ تو اودے ’کالا پانی‘ آ سر کننگاکہ یا دیوار اٹ لیو کریرہ‘ دا لاڈلا غا کس اس سوج کپک‘ اسہ لاڈلہ سے جھرلو نا کمک اٹ سرسہب کرسا اودے مونی اتنگا و دز و داڑیل نا بیانیہ سبہب وشام چلیفنگا۔ فارن فنڈنگ کیس پک مسنے‘ الیکشن کمیشن راستکی تا بنداو آ فیصلہ کرینے‘ داسہ اسہ آڈیو اس بس اوٹی اسہ سپریم کورٹ جج انا بارو اٹ بھاز آ راستکی تے بیان کننگا‘ خدا چاہک دادوبہ غاک راست ءُ یا آخا۔ چیف جسٹس ءِ پاوہ کہ ہندا آڈیو نا فرانزک آڈٹ ءِ کرفے‘ آڈیو غلط ءِ تو اونا زموار تے سزا تننگے‘ اگہ درست ءِ گڑا اونا وڑ اٹ کارروائی کننگے، ریاست مدینہ ناپن آ قوم اتون دُرو کے و تینٹ خانہ کعبہ نا ماڈل نا گھڑی ءِ بہا کے اوڑتون ہچ ہیت مننگ کپک‘ تانکہ قوم آن معافی خواتنہ اوڑتون ہیت کپنہ۔ دا خیال آتا درشانی ءِ او سَے شنبے نا دے قومی اسمبلی نا دیوان اٹ تران کرسا کرے‘ قومی اسمبلی نا دیوان اسپیکر قومی اسمبلی راجہ پرویز اشرف ناکماشی ٹی اڈ ہلک‘ شہباز شریف پارے کہ پاش وڑ اٹ مچ آقوم ءِ دا پاننگا کہ دا حکومت امریکہ ناسازش ناسوب آن جوڑ مسنے‘ کیہی تُو اسکان دا بندغ اتون دروغ تڑے ولے منہ ہفتہ مست تینا عادت نا وڑ اٹ یوٹرن ہلک و پارے کہ امریکہ نا سازش آخا دا تیناتا سازش اس ئس‘ بھلو بھلو ڈرامہ کروک بسنے ولے دا وڑ انا راگ شاید کہ کس کروءِ۔ وزیرخارجہ بلاول بھٹو و نن یانزدہ تُو آن سنگت ملک آتے راضی کننگ نا کوشست کننگ اٹی ان دا بندغ ملک آتا شرفدار آتے ناراض کرے‘ عمران نیازی آئی ایم ایف تون معاہدہ کرے و ولدا اونا خلاف ورزی ءِ کرے‘ پاکستان ءِ ڈیفالٹ نا دنگ آسر کرے‘ نن بھاز مشکل اٹ قوم ءِ ڈیفالٹ آن بچفین‘ اینو ہم آئی ایم ایف تون ہیت کننگ ان‘ آئی ایم ایف گام گام آ ننے آن گارنٹی خواہنگ اٹی ءِ‘ نن آئی ایم ایف نا کل شڑت آتے پورو کرین‘ داسہ ننے پاننگ انگ ءِ کہ سنگت ملک آتا کروک کمٹمنٹس آتے پورو کرفنگے‘ عمران نیازی نا چار سال انا دور اٹ ملک انا وامک 70درسَد ودار‘ اسہ پوسکن ءُ خشت اس ہم تخنگتو بلکہ خشت آتے کشنگا‘ ارا کروڑ نوکری و پنجا لکھ اُرا نا قول کننگا‘ مخلوق بے روزگار مس۔ وزیراعظم پارے کہ مفت نت بشخنگ اٹی ان‘ بینظیر انکم سپورٹ پروگرام نا رد اٹ کمک ہم کننگ ان‘ اینو سفید پوش آک ہم لین اٹ خننگ انگ ءُ‘ دا کل بیدادی و بھسکاری تے عمران نیازی ملک اتون کرے۔ عمران نیازی لابنگ فرم اس ہائر کرینے۔

(آن لائن)