سعودی عرب نا ڈپٹی وزیر داخلہ 12 مارچ آ پاکستان آ بریک

فیصل آباد : پاکستان مسلم لیگ ن پنجاب نا صدر وبنجائی وزیر داخلہ رانا ثناء اللہ خاں پارینے کہ سعودی حکومت تون ننا بھاز جوان ءُ تعلقداری ءُ‘ روڈ ٹو مکہ پراجیکٹ اٹی اواری نا رد اٹ پاکستانی حاجی تا امیگریشن ءِ پاکستانی بالی پٹ آتیان سعودی کارندہ غاک کیرہ۔ سعودی عرب نا ڈپٹی وزیر داخلہ 12 مارچ آ پاکستان نا سرکاری دورہ ءِ کیک‘ ہراٹی تین پہ تینی استخواہی تاامور تتون اوار پاکستانی حاجی تا آسراتی تیکن لاہور تون اوار ایلو بالی پٹ آتے سعودی عرب نا انقلابی پروگرام “روڈ ٹو مکہ پراجیکٹ ” اٹ اوار کننگ نا پک فیصلہ کننگک۔ سیلف بائیو میٹرک، کرونا وائرس آن مست حج 2019 نا کوٹہ ناپورو بحالی وایلو آسراتیک ہم دوئی مریرہ۔ دا خیال آتا درشانی ءِ او فیصل آباد چیمبر آف کامرس اینڈ انڈسٹری نا خطہ خلیج تون جہانی کمک نا کمیٹی نا سروک حافظ شفیق کاشف تون اوڑدہی نا وخت آ ہیت وگپ کرسا کرے۔ وزیرداخلہ رانا ثناء اللہ خان حافظ شفیق کاشف نا اُرائی نا کزیت آ ہڑزخواہی کرے۔ حافظ شفیق کاشف بنجائی وزیرداخلہ رانا ثناء اللہ خاں نا ہڑزخواہی کن بننگ آ منت ءِ ہرفسا سعودی عرب نا داسہ نا سرسہب دورہ و ہڑتوم آ ملک آتا نیام اٹ گچین ورکنگ ریلیشن شپ ٹہیفنگ آ اودے مبارکبادی تس‘ او دادے ہڑتوم آ اسلامی ملک آتیکن جوان ءُ گام اس گوندا۔ حافظ شفیق کاشف خواست کرے کہ ہڑتوم آ ملک آک حاجی تے ودکی مالی خڑچ آن بچفنگ کن ٹیکس فری کیر۔ اوپارے کہ خطہ خلیج و پاکستان نا نیام اٹ کل بشخ خاص وڑ اٹ تین پہ تینی واپاری‘ زرگزرانی سرجز آتے ٹی ودکی وخت انا خواست ءِ۔ او وزیراعظم شہباز شریف ناکماشی ٹی خلیجی ملک خاص وڑ اٹ سعودی عرب تون تعلقداری تے ودفنگ نا گام گیج آتا ستاءِ کرے۔

(آن لائن)