کوہلو ٹی بارودی سرنگ نا دھماکہ، لیویز کارندہ اس شہید

کوہلو: بلوچستان نا ضلع کوہلو ٹی بارودی سرنگ نا دھماکہ ٹی اسہ لیویز کارندہ اس شہید و شش ٹھپی مسر۔ لیویز کمامدار آتا رد اٹ ضلع کوہلو نا علاقہ جنت والی ٹی کھڈ کروک بارودی سرنگ نا دھماکہ ہمو وخت آ مس ہراتم سکیورٹی فورس تا گاڈی ہموکان گدرینگاکہ۔ ڈائریکٹر جنرل لیویز نصیب اللہ خان کاکڑ پارے کہ لیویز نا ٹرک بارودی سرنگ ءِ لتاڑا و دھماکہ ٹی ترخا۔ او مستی پارے کہ دھماکہ ٹی اسہ کارندہ اس زوال مسنے وخت اس کہ پین شش کارندہ ٹھپی مسنو۔ نصیب اللہ کاکڑ پارے کہ سکیورٹی کمامدار آک دھماکہ نا ہند آ سر مسر و ٹھپی تے کوہلو نا ڈسٹرکٹ ہسپتال آ سر کریر وخت اس کہ بھاز ٹھپی مروک لیویز کارندہ غاتے درمان کن سی ایم ایچ کوئٹہ غا گدریفنگا۔

(آن لائن)