رول آف لاء روڈ میپ آ جوان عمل مننگ ءِ، میر ضیاء لانگو
Get real time updates directly on you device, subscribe now.
کوئٹہ: صوبائی وزیر داخلہ و قبائلی امور میر ضیاء اللہ لانگو نا کماشی ٹی بلوچستان اٹ رول آف لاء پروگرام نا روڈمیپ نا بابت اٹ جوڑ کروک آ سٹیرنگ کمیٹی نا ششمیکو دیوان کوئٹہ ٹی اڈ ہلک۔ ہراٹی اصلاحات نا اولیکو پنچ سال نا مرحلہ نا سرسہب پورو و 2023-26ء کن تیار کروک آ پوسکن آ روڈمیپ نا جاری کننگ آ اُست خواہی نا درشانی ءِ کرے۔ دیوان اٹی فریق آک کانود نا حکمرانی نا پڑ اٹ شواہد آ مبنی اصلاحات نا کاریم ءِ مستی اتنگ نا درشانی ءِ کرے تانکہ بلوچستان اٹ کانود نافذ کروک آ ادارہ غاتیا اُلس نا اعتماد و بھروسہ ءِ پین سوگو کننگے۔ محکمہ داخلہ و قبائلی امور حکومتِ بلوچستان نا ایڈیشنل سیکرٹری زاہد سلیم تینا بنائی ہیت آتیٹی روڈمیپ نا رداٹ اہم اصلاح آ عملدرآمد نا بابت اٹ اُست خواہی و خواری ٹی کاریم کننگ آ کل ادارہ و محکمہ غاتا ستا ءِ کرے۔ پوسکن آ پنچ سال نا روڈمیپ نا اہمیت آ ہیت کرسا او پارینے کہ تدوک آ مرحلہ نا سرسہبی ءِ مستی اتسا کانود نا حکمرانی نا نظام ءِ مستحکم کننگ نا چر ءِ برجا تخنگے و کل شاریک خاص کر بھاز زہمی آ تپہ غاتیکن فراوانی نا جوان انتظام و جوان کاریم تے پک کننگے۔ او دا پروگرام کن مالی کمک آ یورپی یونین و تکنیکی کمک آ یو این او ڈی سی نا منتواری ءِ ہرفے۔ روڈمیپ نا رداٹ ادارہ غاتا کہول آ فیصلہ کننگ و مچ آ نظام نا کارکڑد ءِ جوان کننگ کن نتیجہ غاتیا کاریم کننگے۔ دیوان نا بابت کل ادارہ و شونداری پارٹنر آتون ملسا روڈمیپ اٹ مروک آ کاریم تا جاچ ءِ ہلنگ نا وارخواہی رسینگا۔ دیوان نا اولیکو وار بلوچستان پولیس، پراسیکیوشن، جیل خانہ جات، لیویز و ریکلیمیشن اینڈ پروبیشن ڈپارٹمنٹ نا نمائندہ غاک صوبائی کہول آ کانود نا حکمرانی نا بابت طے مروک آ ٹارگٹ آ تینا تینا محکمہ غاتا کارکڑد ءِ پیش کرے۔ فوجداری نظام انصاف نا ادارہ غاتیٹی دا بشخ انا کہول آ رابطہ نا کمک اٹ بنداوی ویل آتے مر کننگ اٹ پیش بروک آ سختی و دا بابت اٹ دوئی مروک آ سرسہبی تا بارواٹ معلومدار کننگا۔
(خ ن)