راوی اربن پراجیکٹ آ فیصلہ ءِ سپریم کورٹ اٹ چیلنج کینہ، عمران خان

شیخوپورہ: وزیر اعظم عمران خان پارینے کہ راوی اربن پراجیکٹ آ فیصلہ ءِ سپریم کورٹ اٹ چیلنج کینہ، اسلام آباد آن پد پلاننگ نا رد اٹ اولیکو وار لاہور ارٹمیکو بھلا شار جوڑ مریک، دا ڈٹ انا رد اٹ راوی دریاب ءِ بچفنگ مننگ کیک، ننا اولیکو حکومت ءِ ہرا چاگڑدی کچٹی نا چٹفنگ نا زمواری ءِ کوپہ غاتیا ہرفے۔ لاہور ہائیکورٹ اٹی راوی اربن ڈویلپمنٹ پراجیکٹ ءِ جوان وڑ اٹ پیش کننگتویسس، راوہ پراجیکٹ آن ملازمت نا پوسکن ءُ وارخواہی ودی مریک، سی چِل صنعت ہم لگرہ، دا ہیت آتا درشانی ءِ او رکھ جھوک اٹی تینا دورہ نا وخت آ ہیت و گپ کرسا کرے۔ وزیر اعظم پارے کہ راوی اربن ڈویلپمنٹ راوی دریاب نا چاگڑد ءِ گچین کننگ کن ءِ، تاکہ دریاب نا دیر ءِ رکھسا بروک آ چین تے دیر و کن خور نا گرج آتے پورو کننگ تون اوار چاگڑد ءِ ہم گچین کننگ مرے۔ لاہور نا دورہ نا وخت آ وزیر اعظم کیہی دیوان تا کماشی ءِ ہم کرے۔اسہ دیوان اسے نا کماشی نا وخت آ حوال اٹی وزیراعظم عمران خان ءِ پاننگا کہ سینٹرل بزنس ڈسٹرکٹ ڈٹ انا اولیکو ریسہ ٹی 24 ارب روپئی نا زرکاری مس، بروک آ تُو ڈٹ انا پین 7 شونداری سائٹ آتا نیلامی آن ارب آ روپئی نا زرکاری گمانی ءِ۔ جمعہ نادے آ وزیراعظم آفس نا میڈیا ونگ آن جاری بیان نا رداٹ دورہ لاہور نا وخت آ وزیراعظم عمران خان ءِ لاہور اٹی سینٹرل بزنس ڈسٹرکٹ آ حوال تننگا۔ حوال اٹی وزیراعظم ءِ پاننگاکہ ڈٹ انا اولیکو فیز اٹی 24 ارب نا زرکاری مس۔ ڈٹ لاہور نا نیام اٹ جہانی آب انا کاروباری ہند و ہنکین تا آسراتی فراوان کیک۔ داکان بیدس چاگڑدی رکھ، گرین روف، اربن پارکس و برساتی دیر ءِ کوڑی کرسا کاریم اٹ اتنگ کون آ گام گیج آک ہم ڈٹ انا بشخ ءُ۔ بروک آ تُو ڈٹ انا رداٹ پین 7 شونداری سائٹ آتا نیلامی آن ارب آ روپئی نا زرکاری گمانی ءِ۔ حوال اٹی پاننگاکہ سینٹرل بزنس ڈسٹرکٹ نا پوروی آن نئے بیرہ روزگار نا وارخواہی ودی مریک و ملک اٹی زرکاری ودک بلکن ریونیو ٹی 1500 ارب روپئی نا ودکی مریک،۔ داکان بیدس ڈٹ اٹ باب پاکستان ڈٹ انا پوروی و والٹن ایئرپورٹ نا گدریفنگ ہم اوار ءِ۔ داوخت آ بنجائی وزیر چوہدری فوادحسین، اسد عمر، شفقت محمود، خصوصی کمکار ڈاکٹر شہبازگل، سلاہکار کامرس عبدالرزاق داؤد، وزیر مملکت حوالکاری و شینکاری فرخ حبیب، وزیراعلیٰ پنجاب سردار عثمان بزدار، سی ای او سینٹرل بزنس ڈسٹرکٹ عمران امین، چیئرمین این اے پی ایچ ڈی اے لیفٹیننٹ جنرل (ر) انور علی حیدر، تعلقدار بڑزکو آفیسر وفیزون نا زرکارآک بشخ ہلکر۔

(آن لائن / اے پی پی)