ریاست نا عملداری ءِ چیلنج کروک آتے بشخپنہ، میر قدوس بزنجو

تربت: وزیر اعلیٰ بلوچستان میرعبدالقدوس بزنجو پارینے کہ کیچ بلوچستان اٹی دہشت گردی نا مذمت ءِ کینہ، بلوچستان حکومت و الس تیان فورس آتتون سلوک ءُ۔ و فورس آک جیرتی ءُ۔ دہشت گردی نا پبی وڑ اٹ مون ءِ توررہ۔ریاست نا عملداری ءِ چیلنج کروک آتے بشخپنہ، بلوچستان نا شونداری و امن ءِ خراب کننگ آن نسخان بلوچستان و اونا الس ءِ مریک، پنجاب و ایلو صوبہ غاتے ہچ مفک۔ دہشت گرد آتا ہرا مسخت ءِ او پورو مفک۔ بلوچستان نا مخلوق پاکستان تون سلوک ءِ۔ بلوچستان اسمبلی نا نمائندہ غاک جتا جتا علاقہ غاتیان وونٹ ہلیرہ بریرہ، دانا مطلب دادے کہ بلوچستان نا بندغ آک ریاست تون ءُ۔ بلدیاتی نظام اٹی ترمیم نا گرج ءِ، دو شنبے نا دے کابینہ نا دیوان اٹی دا ہیت آ سجفنگک، مئی ٹی بلوچستان اٹی بلدیاتی گچین کاری کرفنگے۔ وزیر اعلیٰ بلوچستان عبدالقدوس بزنجو صوبائی داخلہ سلاہکار میر ضیا لانگو و چیف سیکرٹری بلوچستان تون اوار دورہ تربت نا وخت آ میڈیا تون ہیت و گپ کرسا پارے کہ بلوچستان اٹی دہشت گرد آتا برخلاف کارروائی کن صوبائی حکومت تینا کانود نافذ کروک ادارہ غاتتون سلوک ءِ۔ او زُوت آتیٹ دشت انا ہند آ دہشت گرد واقعہ نا سختی اٹ مذمت ءِ کرسا پارے کہ دہشت گردی نا برخلاف ننا جیرت بڑز ءِ۔ او پارے کہ تربت اٹی کنا دورہ نا مسخت پاک فوج انا ورنا تا شہادت آ پاتیا کننگ و تخریب کاری نا برخلاف جنگ اٹی اوفتا بڑائی ءِ چٹفنگ ئس۔ دا وخ تآ او پارے کہ تخریب کار آک تینا مسخت اٹ اسُل سرسہب مفسہ۔ او پارے کہ بلوچستان نا الس دہشت گرد آتا برخلاف کارروائی کن ریاستی ادارہ غاتتون سلوک ءِ۔ او پارے کہ دہشت گرد کارروائی تیان کس ءِ فائدہ مفک، بلکہ داڑان بلوچستان نا الس ءِ بے کچ نسخان رسینگک۔ او پارے کہ خدا نا پن اٹ ہوش کبو، و بلوچستان نا الس آ رحم کبو۔ او پارے کہ تخریب کار آک تینا گندہ غا مسخت اٹ اسُل سرسہب مفسہ۔ دا وخت آ او پارے کہ پولیس ءِ پوسکن آ سلہہ غاتیان شُپ کرسا اوفتا کارکڑد اٹ گچینی اتنگک۔

(آن لائن)