پاک فوج و سکیورٹی فورس آتا قربانی تیان صوبہ ٹی امن بحال مسنے ،نور محمد دمڑ
Get real time updates directly on you device, subscribe now.
ہرنائی (آن لائن) بلوچستان عوامی پارٹی نا بنجائی راہشون صوبائی وزیر حاجی نورمحمد خان دمڑ تربت نا علاقہ ٹی فورس آتا گشتی گاڈی تیا دہشتگر آتاجلہو نا مذمت ءِ کرسا واقعہ ٹی فورس آتا کارندہ غاتا شہادت و ٹھپی مننگ آ است ہسونی نا درشانی کرینے۔ او پارے کہ پاک فوج وایلو سکیورٹی فورس آتا قربانی تا سوب آن صوبہ ٹی امن بحال مسنے پاک فوج و ایلو فورس آک اسیجائی اٹ ملک دشمن آتا مخ ءِ پرغانو داسہ ہرافک چنکو کچ اسے ٹی بچانو اوفک ڈکوئی اٹ جلہو کننگ اٹی ءُ پاک فوج ‘ سکیورٹی ادارہ و حکومت و الس اسہ بیج آٹو‘ ملک و صوبہ غان اخریکو دہشت گرد نا چٹنگ اسکان اوفتے النگپک۔ او شہید نا خاہوت تون است ہسونی و ٹھپی تا جانجوڑی کن دعا کرے۔دا خیال آتا درشانی ءِ او گچین کاری حلقہ نا علاقہ خرشنگ اٹ اسہ بھلو جلسہ سے آن تران کرسا کرے‘ ہراڑے سَد آ بندغ آک جمعیت علماءاسلام آن 20 سال سیاسی خڑکی ءِ چٹفسا صوبائی وزیر حاجی نورمحمد خان دمڑ ناکارروان و بی اے پی ٹی اوار مننگ ناپڑو کریر۔ جلسہ غان پارٹی نا راہشونی حاجی ملک لاجور عرف بڈو دمڑ، عبدالناصر ترین ایڈوکیٹ، سردار عتیق تارن، ملک گل رنگ زیب کاکڑ، اختر محمد دمڑ وایلوفک ہم تران کریر۔ دا وخت آ خرشنگ جمعیت علماءاسلام نا سینئر کارندہ اختر محمد دمڑ، حبیب دمڑ اسک تینا خاہوت وسَد آ سنگت آتون اوار جمعیت علماءاسلام آن استیفہ ترسا بلوچستان عوامی پارٹی نا اوار مننگ ناپڑو کریر۔ جلسہ غان تران کرسا صوبائی وزیر حاجی نورمحمد خان دمڑ پارے کہ خرشنگ اٹ اسہ بھلو جلسہ والس اٹ پامداری ءِ خنسا بھاز خوش مسٹ انتئے کہ الس ءِ سیاسی راگی تیان خلاس کننگ کن ای بیست سال جہد کریٹ ہرانا بھرم تا بنا مسنے۔ او پارے کہ حلقہ نا الس نا چل سال انا محرومیک پنچ سال اٹ چٹنگ تو کپسہ ولے حلقہ نا گوجالوک علاقہ غاتا ویل آتے ایسر کننگ کن دے ونن کوشست کننگ اٹی اٹ۔او پارے کہ گچین کاری حلقہ ٹی رنگ‘ نسل‘ بولی زئی و خیلی آن ایڑتر بریبری نابنداو آ شونداری کاریم کننگ انگ ءِ۔