خیبرپختونخوا حکومت نا ایس او پی تا رداٹ گوازی تا بنا کننگ نا فیصلہ

پشاور (مانیٹرنگ ڈیسک) خیبرپختونخوا حکومت کورونا دَین نا سوب آن گوازی تے کن ایس او پیز آتا رداٹ عئید آن زو اس پد ملنگ نا فیصلہ کرینے ۔ حکومت نا کنڈآن اسپورٹس ڈائریکٹریٹ ءِ پارت کرینے کہ گوازی تا پِڑ تے ملنگ نا تیاری تے کننگے، مچ آ صوبہ نا اسٹیڈیم منتظم تے پارت کننگانے کہ گوازی گرتے ایس او پیز آتیا عمل درآمد نا پابند کننگے، دا بابت اٹ معلومداری مسنے کہ حکومت معطل انگا گوازی تا سرگرمی تے عئید آن پد بحال کننگ نا فیصلہ کرینے کہ کورونا دَین آن بچنگ کن ڈائریکٹریٹ آف اسپورٹس ایس او پی تے تیار کرینے ۔ حوال نا رداٹ ایتھلیٹک ٹریک،فٹبال، ہاکی، لان ٹینس، مارشل آرٹس، جیم، بیڈمنٹن، اسکواش، باکسنگ، باسکٹ بال، کرکٹ گوازی تا آسراتی تے تننگ انگ ءِ، ہر گوازی نا بابت اٹ جتا جتا ایس او پیز آک جاری، ایس او پیز آتا رداٹ کل گوازی گر تے کن ماسک بیننگ المی پن کننگانے، سینٹائزر آتے کاریم اٹ اتنگک، ہر گوازی ٹی گوازی گر تینا گڑاتے کاریم اٹ اتیک، گوازی گر تا نیام اٹ فاصلہ ءِ پک کننگے ۔ کرکٹ اٹ اسہ نیٹ آ بیرہ اِرا باولر اسہ وخت اٹ باولنگ کننگ کیرہ، ہندن ایلو گوازی تا ٹریننگ اٹی ہم مری تے پک کننگک ۔ عئید آن پد گوازی تا کاریم تیا پابندی تے چٹفنگ انگ ءِ، ولدا ہم گوازی تا مقابلہ غا پابندی سلوک مریک ۔ دا بابت اٹ ڈائریکٹر جنرل سپورٹس اسفندیار خٹک تون حال احوال کننگا تو او پارے کہ گوازی تا بحالی نا بابت اٹ ایس او پیز تیار کننگانے ولدا ہم پک انگا فیصلہ وزیراعظم نا منظوری آن پد کننگک، او پارینے کہ کورونا دَین آن گوازی گرتا گوازی ہم زہمی مسنے ہندا سوب آن عئید آن پد گوازی تے ولدا بنا مننگ آن گوازی گرتے تیاری نا وارخواہی رسینگک ۔