در ملکی ٹیمک ہم پاکستان اٹ کرکٹ نا خواہندار ءُ‘وسیم خان

لاہور (مانیٹرنگ ڈیسک) پاکستان کرکٹ بورڈ نا چیف ایگزیکٹیو وسیم خان پارینے کہ داسہ پاکستان نا حالیت آک جتا ءُ، تدوک آ سیزن اٹ سری لنکا بنگلہ دیش و ایم سی سی آن پد کیہی ٹیمک پاکستان آ بسوسُر ۔ درملکی ٹیم تا پاکستان نا بارواٹ خیال آک بدل مننگ اٹی ءُ ۔ درملکی ٹیمک سمجھرہ کہ پاکستان اٹ بایدے کرکٹ مرے ۔ ای 2019ء ٹی پاکستان کرکٹ بورڈ اٹ بسوسُٹ ۔ اوکان پد کیہی ٹیمک پاکستان نا دورہ ءِ کرینو و کیہی پین ٹیم بریرہ ۔ اسہ انٹرویو سے ٹی او پارینے کہ پاکستان کرکٹ ٹیم ءِ انگلینڈ آ راہی کننگ نا فیصلہ بھاز سخت ئس ۔ کوویڈ 19 ٹیسٹ نا مثبت بننگ آن پد ذہنی پریشر نا گواچی مسوسُن ۔ وسیم خان پارینے کہ او وخت پی سی بی کن بھاز سخت ءُ وخت اس ئس ۔ او پارینے کہ ویسٹ انڈیز دا وخت آ انگلینڈ آ ہننگ نا فیصلہ ءِ ہراتم اوڑے حالیت آک زیات خراب ئسر ۔ ویسٹ انڈیز نا فیصلہ نا سوب آن ننے ہم تینا فیصلہ ءِ کننگ اٹ آسانی مس ۔ ننے آن ہرفنگک کہ ٹیم ءِ انتئے راہی کریرے، دا سوج ویسٹ انڈیز آن ہم بایدے مرے، دنیائے کرکٹ کن گوازی نا بحالی بھاز اہم ئس ۔ ہندا سوب آن دا فیصلہ ءِ کرین ۔ کوویڈ و کرکٹ ءِ داسہ اوار اوار چلینگوئی ءِ ۔ گلوبل کرکٹ آن بیدس دا فیصلہ نا ہچ ءُ سوب اس الو ۔ سکیورٹی و کوویڈ نا بنداو آ فیصلہ غاک جتاوَ جتاوَ گڑا ءُ ۔ دا وخت آ دانا بدلہ نا سیریز اسے کن کیہی ملک آتون ہیت وگپ کننگ اٹی اُن، پاکستان ٹیم تون دا بھلو وخت اس ارے، حالیت آتا جوانی نا اتنظار اُن ۔ تدوک آ دے اسہ ویڈیو کلہو اسے ٹی او پارینے کہ پاکستان کرکٹ بورڈ ٹی ٹونٹی ورلڈ کپ و ایشیا کپ نا کینسل مننگ آن پد حکمت عملی جوڑ کننگ ءِ بنا کرین ۔