بلوچستان اسمبلی، پنجاب اٹ بلوچ پشتون طالب علم آتے تنک کننگ مذمت
Get real time updates directly on you device, subscribe now.
کوئٹہ (تلار حوالکار) بلوچستان اسمبلی نا دیوان اٹ پشتونخوا ملی عوامی پارٹی نا باسک نصراللہ زیرئے 20جنوری آ لاہور اٹی دھماکہ غان پد پنجاب یونیورسٹی و ایلو جامعہ غاتیٹی خوانوک و چندی ہند آتیا کاریم کروک پشتون بلوچ طالب علم و ایلو بندغ آتے دزگیر کننگ، تھانہ غاتیا دننگ نا کنڈ آ ایوان نا چکار ءِ کرفے، و خواست کرے کہ وزیر داخلہ پنجاب حکومت تون دا بابت ہیت کے۔ او مہاجر قومی موومنٹ نا راہشون آفاق احمد نا پشتون تا برخلاف تروک بیان نا سخت انگا لوز آتیٹی مذمت ءِ کرے۔ داخلہ سلاہکار میر ضیاء اللہ لانگو پارے کہ طالب علم آتا ویل آتیا حکومت ہچ ءُ سمجھوتہ اس کپک۔ تدوک آ دیوان اٹی طالب علم آتے زیزاریفنگ نا واقعہ غاتا مننگ آن دمدستی پد پنجاب نا تعلقدار کمامدار آتتون رابطہ کننگا، و ہرا طالب علم آتے دزگیر کننگاسس، اوفتے یلہ کننگا۔ داخلہ سلاہکار باور کرفے کہ او کوشست کیک کہ سی ٹی ڈی نا اسامی تیٹی قد انا شڑت ءِ پنچ فٹ کننگے۔ اخیر اٹ ڈپٹی اسپیکر رولنگ تس کہ داخلہ سلاہکار پنجاب حکومت تون حوال کرسا طالب علم آتا رکھ ءِ پک کے۔