بجلی نا نظام اٹ گچینی کن عملی گام گیج کروئی تمک،گورنر بلوچستان

کوئٹہ، گورنر بلوچستان جعفرخان مندوخیل پارینے کہ بجلی نا فراوانی نا نظام اٹی گچینی اتنگ کن بیرہ پڑو بس اف بلکہ عملی گام گیج و اوفتا ریسہ ءِ المی جوڑ کروئی تمک، غیر اعلانیہ لوڈشیڈنگ نا ریسہ ءِ دمدستی وڑ اٹ ایسر کرسا بجلی نا صارف آتے جوان وولٹیج تون اوار بے سلنگ آن بجلی نا فراوانی کن گام گیج کننگے‘ گورنر مندوخیل پارے کہ کیسکو کمامدار آک تینا دفتری و انتظامی وڑوڈول ءِ پین بھرمی و الس دوست جوڑ کیر و شکایات سیل 118 آ رسینگوک بجلی صارف آتا غاو تا دمدستی ایسری ءِ پک کننگے، الس تون جوان رویہ تینائی کننگ ادارہ نا زمواری ءِ۔ دا خیال آتا درشانی ءِ او چیف ایگزیکٹو آفیسر کیسکو انجینئر مرزا اعزاز بیگ نا کنڈآن تروک بریفنگ نا وخت آ گپ وتران کرسا کرے۔ داوخت آ گورنر جعفرخان مندوخیل پارے کہ لوڈشیڈنگ، کم وولٹیج و خاص وڑ اٹ اوور بلنگ نا منفی زہم تا سوب آن باقاعدگی اٹ بجلی نا بل تروک صارف آک ہم بھاز خواری تا گواچی ءُ، ہمو صارف آتے آسراتی فراوان کننگ المی ءِ ہرافک تینا زمواری ءِ پورو کرسا وخت آ بل ایترہ۔ گورنر بلوچستان دا ہیت آ ہم زور شاغا کہ واپڈا و تعلقدار ادارہ تا زرتس آتیا پورو چکار کننگے تاکہ ادارہ غاتا جم مالی و انتظامی کارکڑد پین گچین مرے و بجلی نا نظام آ سٹی زور کم مننگ کے۔ او پارے کہ بھلا سرکاری دفتر آتیٹی دفتری وخت اٹی بجلی نا فراوانی ءِ پک کننگ تون اوار ہسپتال، تعلیمی ادارہ و ایلو اہم السی بنجا تے بجلی نا فراوانی ٹی خاص اولیت تننگے انتئے کہ دا ادارہ غاتا ہڑدے ئی سرجز آک بجلی نا ریسہ تون دراست گنڈوک ءُ۔ گورنر بلوچستان الس آ زور شاغا کہ او بجلی نا بل تے تننگ اٹ پورو کمک کیر۔ حکومت و بجلی نا ادارہ غاتا زمواری ءِ کہ او الس ءِ گچین آسراتی فراوان کیر وخت اس کہ صارف آتا کمک بجلی نا نظام ءِ سوگو کننگ و سروس ڈیلیوری ءِ گچین کننگ اٹی اہم کڑد ادا کیک۔