الس ءِ گچین و پوسکنوڑ سفر و طبی آسراتی تا فراوانی کن عملی گام گیج کننگ انگ ءِ،میر سرفراز بگٹی

کوئٹہ، وزیراعلیٰ بلوچستان میر سرفراز بگٹی تون پاکستان پیپلز پارٹی بلوچستان نا صوبائی جنرل سیکرٹری ربانی خان کاکڑ نا کماشی ٹی ڈویژن و ضلع غاتیان تعلقدار پارٹی عہدیدار و سرکڑدہ غاک اوڑدہی کریر۔ اوڑدہی ٹی پارٹی باندات‘ تنظیمی باندات و الس ءِ مون تروک ویل آتیا جم گپ وتران کننگا۔ دا وخت آ پارٹی راہشونک تینا تینا علاقہ غاتیٹی الس ءِ مون تروک ویل و گرج آتیان وزیراعلیٰ بلوچستان ءِ معلومدار کریر۔ وزیراعلیٰ میر سرفراز بگٹی ڈَل اٹی اوار پارٹی راہشون تا ویل و سلاہ تے سکوت اٹ خف تورے و السی فائدہ غاتتون تعلقدار کیہی باندات آتاا منظوری ءِ ہم تس۔ وزیراعلیٰ بلوچستان پارے کہ صوبہ نا الس ءِ گچین و پوسکنوڑ سفر و طبی آسراتی تا فراوانی کن عملی گام گیج کننگ انگ ءِ‘ او پارے کہ بینظیر بھٹو ایمرجنسی رسپانس ٹراما سینٹر، پیپلز ایئر ایمبولینس، پیپلز گرین بس و پیپلز پنک بس سروس الس ءِ آسراتی تا فراوانی کن فعال ءُ۔ او پارے کہ الس ءِ پوسکنوڑ‘ رکھوک و کم خڑچ سفر نا آسراتی فراوان کننگ کن ”جناح پیپلز ٹرین سروس“ہم زوت بنا کننگک ہراڑان کوئٹہ و ایب کیب انا شاری تے سفر نا گچین آسراتی رسینگک۔ میر سرفراز بگٹی پارے کہ پاکستان پیپلز پارٹی نا سرکڑدہ و کارندہ غاک الس تون دراست حوالی مرسا اوفتا ویل آتا نشاندہی و ایسری کن تینا کڑد ءِ ادا کننگ اٹی ءُ۔ السی ویل آتا ایسری و بنداوی آسراتی تا فراوانی کن حکومت بلوچستان نا گام گیج آتا ریسہ برجا سلک۔ اوڑدہی ٹی پارٹی نا ایلو راہشون و عہدیدار آک ہم تینا علاقہ غاتتون تعلقدار باندات آتیا وزیراعلیٰ بلوچستان تون ہیت کریر۔ داوخت آ صوبائی وزیر ڈٹ بندی و شونداری میر ظہور احمد بلیدی ہم ساڑی ئس۔