مسٹمیکو ٹیسٹ ڈرا‘ سیریز ءِ 1-0 ٹی انگلینڈ کٹا

لاہور (مانیٹرنگ ڈیسک)پاکستان او انگلینڈ نا نیام اٹ مسٹمیکو ٹیسٹ میچ ڈرا غا ایسر مس او انگلینڈ سیریز 0-1 اٹ تینا پن آ کرینے۔ انگلینڈ 10 سال آن پد پاکستان نا برخلاف ٹیسٹ سیریز ءِ کٹا۔ محمد رضوان او بٹلر مین آف دی سیریز پن مسر۔ پاکستان او انگلینڈ نا نیام اٹ مروک آ سیریز نا مسٹمیکو ٹیسٹ میچ نا پنچمیکو دے انا گوازی مچ آ نن مروک آ پِر نا سوب آن پِڑ نا پالن مننگ نا سوب آن گوازی اُرے آ بنا مس۔ کم از کم ارا سیشن نا گوازی نا زیان مننگ آن پد میچ ولدا بنا مس تو پاکستان نا کیپٹن اظہر علی اُرے اسکان وکٹ آ سلنگ کتو او جیمز اینڈرسن نا وکٹ جوڑ مس۔ داڑتون اوار اینڈرسن ٹیسٹ کرکٹ اٹ 600 وکٹ ہلنگ نا اعزاز ءِ دوئی کرے او دا کارنامہ ءِ دوئی کروک آ دنیا نا اولیکو فاسٹ باؤلر جوڑ مس۔ داڑان بیدس بابر اعظم تون کمک کننگ کن اسد شفیق بس او ہڑتوم آک چارمیکو وکٹ کن 63 رنز نا پارٹنر شپ اس جوڑ کریر ہراٹی اسد شفیق نا بشخ بیرہ 21 رنز نا سلیس۔ بابر اعظم جوان ءُ گوازی اس کرے او تینا ففٹی ءِ پورو کرے ولے اسد شفیق 21 رنز جوڑ کننگ آن پد حریف کیپٹن جو روٹ ءِ وکٹ ءِ تینا تس۔ وخت اس کہ میچ انا بنا ٹی انگلینڈ نا زیک کرالی او جوز بٹلر نا گچین آ پارٹنر شپ او گچین آ بیٹنگ نا سوب آن 8 وکٹ نا نسخان آ 583 رنز جوڑ کرسا ڈائی ءِ ڈکلیئر کریسُر۔ اولیکو سنچری ءِ جوڑ کروک آ کرالی 267رنز نا ڈائی اس گوازی کریسُس وخت اس کہ جوز بٹلر 152رنز جوڑ کننگ اٹ سرسہب مس۔ ورندی ٹی کیپٹن اظہر علی نا گچین آ 141 رنز نا ڈائی آن پد ہم پاکستانی ٹیم 273 جوڑ کرسا آؤٹ مسوسُس۔ انگلینڈ نا کنڈآن جیمز اینڈرسن 5وکٹ ہلسا کل آن گچین انگا گوازی گر گچین مس۔