جوان کارکڑد نشان تروک آ گوازی گر تے مون آ اتنگ حکومت نا زمواری ءِ‘ جام کمال

کوئٹہ(آن لائن)وزیراعلی بلوچستان جام کمال خان پارینے کہ حکومتی و معاشرتی کہول او ہر فورم آ میرٹ، انصاف او لائخی نا ذکر تو مریک ولے بدقسمتی اٹ داڑا عمل مفک، نن سیاسی کہول آ مصلحت نا گواچی مرسا سہی فیصلہ کننگ کپنہ، ملک او صوبہ نا بھلا بھلا فیصلہ غاتے کرسا سیاسی اوار تمنگ، قومیت او ذاتی تعلقداری ءِ اولیت تننگک ہراڑان ادارہ غاتے نسخان رسینگک او لائخ آ بندغ آک مونی بننگ کپسہ، دا خیال آتا درشانی ءِ او یوم آجوئی نا بابت اٹ اڈ ہلوک سپورٹس او یوتھ فیسٹیول 2020 نا ایسری دود آن تران کرسا کرے۔ ہرانا اڈ ہلنگ صوبائی محکمہ گوازی وامور نوجوانان کریسر، صوبائی وزیر تیان میر ضیا لانگو، سردار نورمحمد دمڑ، میر سلیم کھوسہ، پارلیمانی سیکرٹری ماہ جبین شیران او مبین خلجی ہم دود اٹ ساڑی ئسر وخت اس کہ مچ آ صوبہ غان بروک آ ورنا گوازی گرتا بھلو کچ اس دود اٹ بشخ ہلک، وزیراعلی تینا تران اٹ گوازی تا پِر اٹ میرٹ او لائخی نا بابت اٹ پارے کہ اسٹ اسٹ او ٹیم ورک نا ور اٹ جوان کارکڑد نشان تروک آ گوازی گر تے مون آ اتنگ مینجمنٹ او حکومت نا زمواری ءِ، اگہ ٹیم میرٹ آ گچین متو اسُل سرسہب مننگ کپک، دا لائخی نا دور ءِ اگہ میرٹ مریک تو شونداری مریک او مچ آ راج سرسہب مریک، وخت بسنے کہ نن ہندن ءُ فیصلہ کین ہرافتیان راج، نسل او ملک اس جوڑ مرے۔ او پارینے کہ ہراتم نن تینا زند اکن چنکو فیصلہ ہم کینہ تو جوان گچین کینہ ولے ہراتم اجتماعی فیصلہ غاتا ہیت مرے تو مصلحت آتا گواچی مرینہ، دا رحجان ءِ بدل کروئی مریک، وزیراعلی پارینے کہ ننا راج انا بھلو کچ اس ورنا تتون گنڈوک ءِ ولے راج اٹ جانجوڑ انگا سرگرمی مفننگ نا کچ اٹی ءُ۔ ہرا ذہنی او جسمانی ٹریننگ کن المی ءُ، مالو گوازی تا بشخ او ورنا تے جانجوڑ آ سرگرمی تے اینگ کننگانے ولے ساڑی صوبائی حکومت بروک آ مسہ سال تے ٹی گوازی تا بشخ او ورنا تے کن 15 آن 20ارب روپئی خرچ کیک۔