مانچسٹر یونائیٹڈ او سٹی لیونل میسی ءِ ہلنگ نا اُست خواہ

لاہور (مانیٹرنگ ڈیسک)ارجنٹائن نا سٹار فٹبالر لیونل میسی فٹبال کلب بارسلونا ءِ ہلنگ نا فیصلہ کرے وخت اس کہ خبرک پیری کننگ اٹی ءُ کہ اسٹار فٹبالر ءِ مانچسٹر یونائیٹڈ او مانچسٹر سٹی ہلنگ نا اُست خواہی کرینو۔ حوال نا رداٹ بارسلونا انتظامیہ ہم دا ہیت ءِ پک کرینے کہ ارجنٹینا نا فٹبالر جوان وڑاٹ کلب ءِ ہلنگ نا فیصلہ آن معلومدار کرینے۔ میسی نا کلب ءِ ہلنگ نا سوب آک مون آ بتنو ولدا ہم ہندن پاننگ ءِ کہ میسی چیمپئنز لیگ نا کوارٹر فائنل اٹ خراب بے سہبی آن پد کلب ءِ ہلنگ نا فیصلہ کرے۔ لیونل میسی تدوک آ 20 سال آن بارسلونا تون گنڈوک ءِ وخت اس کہ او کلب نا کیپٹن ہم ارے۔ لیونل میسی بارسلو تون 20 سال نا سیالی ءِ پرغنگ آن پد ہرانگ اننگ اٹی ءِ دا بابت اٹ دا وخت اسکان پک متنے ولدا ہم میڈیا غا دا بابت اٹ خبرک مون آ بننگ اٹی ءُ کہ مانچسٹر یونائیٹڈ لیونل میسی نا پُوسکن آ کلب مننگ کیک۔ برطانوی فٹ بال کلب مانچسٹر سٹی، ہسپانوی فٹ بال کلب بارسلونا او ارجنٹینا نا 33 سال نا اسٹار فٹبالر لیونل میسی ءِ ہلنگ آ سجفنگ اٹی ءُ ولدا ہم برطانوی میڈیا پارینے کہ داوڑ ہمو حالیت اٹ مریک کہ اگہ بارسلونا نا فارورڈ تینا دستیابی ءِ پاش کیک۔ اطالوی فٹبال کلب انٹر میلان نا مسکوہی مالک ماسیمو موراتی پارینے کہ اونا مسکوہی کلب لیونل میسی ءِ ہلنگ نا کوشست کننگ اٹی ءِ۔ ایلو کنڈ آ فرانسیسی فٹ بال کلب پیرس سینٹ گرمین نا کماش تھومس ٹچیل پارینے کہ اونا کلب میسی ءِ بخیر کیک ولدا ہم اودے یقین ءِ کہ لیونل میسی بارسلونا ٹی رہنگ انگ ءِ اولیت ایتک۔ برطانوی سپورٹس چینل ءِ انٹرویو ترسا او پارینے کہ کنا خیال اٹ میسی بارسلونا ٹی رہنگسا تینا کیرئیر ءِ خدا غا سفارک، میسی مسٹر بارسلونا ءِ۔