اوغان ویل انا آخبتی ایسری مذاکرات نا کمک اٹ ممکن ءِ‘شاہ محمود قریشی

اسلام آباد (آن لائن) اوغان طالبان نا ڈل انا وزیر خارجہ مخدوم شاہ محمود قریشی تون اوڑدہی‘اوغانستان امن عمل اٹ مروک آ پیشرفت،بین اوغان مذاکرات نا زوت اس اڈ تننگ تون اوار باہمی دلچسپی نا جتا جتا ویل آتیا ہیت وگپ کننگا۔ حوال نا رداٹ تدوک آ دے ملاعبدالغنی برادر نا کماشی ٹی اوغان طالبان نا ڈل انا وزارت خارجہ ٹی وزیر خارجہ مخدوم شاہ محمود قریشی تون اوڑدہی کرے۔ وزارت خارجہ ٹی مروک آ اوڑدہی نا وخت آ اوغان طالبان نا ڈل وزیر خارجہ ءِ طالبان او امریکہ نا نیام اٹ طے مروک آ معاہدہ غا عملدرآمد نا بابت اٹ تازہ انگا حالیت آتیا معلومدار کرے۔ وزیر خارجہ شاہ محمود قریشی ڈل اتون ہیت وگپ کرسا پارے کہ پاکستان اولیکو دے آن ہندا موقف ءِ دوئی کرینے کہ اوغان ویل انا زو اس ایسری اوغان نا کماشی ٹی مذاکرات نا کمک اٹ ممکن ءِ، او پارینے کہ پاکستان، اوغان عمل امن اٹ، تینا مصالحانہ کرد، مشترکہ زمواری نا رداٹ ادا کرسا بننگ ءِ، پاکستان نا مخلصانہ مصالحانہ کوشست آک، 29 فروری آ دوحہ ٹی طے مروک آ طالبان امریکہ امن معاہدہ نا حالیت اٹی جوان گوندار، گمان ارے کہ اوغان کماش آک، اوغانستان اٹ امن و ایمنی اتنگ کن، دا امن معاہدہ نا حالیت اٹ رسینگوک آ گچین آ وارخواہی آ جوان فائدہ ہرفنہ۔ وزیرخارجہ پارینے کہ پاکستان، ڈیہہ اٹ امن و استحکام اتنگ ءِ پک کننگ کن انٹرا اوغان مذاکرات نا زوت اس اڈ تننگ نا خواہندار ءِ، پاکستان او اوغانستان نا نیام اٹ مالو نا مذہبی، تاریخی او جغرافیائی اعتبار اٹ کڑمب ءُ ایلمی و تعلقداری اسے۔ او پارینے کہ اوغانستان اٹ زرگزرانی وارخواہی تا اتنگ، اوغان باہوٹ آتا عزت اٹ پدی ہننگ او اوغانستان نا زرگزرانی استحکام کن جہانی برادری ءِ تینا کوشست آتے کاریم اٹ اتنگ نا گرج ءِ۔ وزیر خارجہ اوغان طالبان نا ڈل ءِ اوغان امن عمل ءِ سبوتاژ کننگ او ” سپائیلرز ” نا بابت گمانی خلیس آتیان معلومدار کرے۔ اوغان طالبان نا ڈل، اوغان امن عمل اٹ پاکستان نا کنڈآن کروک آ پدریسہ کوشست او اُست انا ہُب اٹ کمک آ وزیر خارجہ مخدوم شاہ محمود قریشی نا منتواری ءِ ہرفے۔