بلوچستان نا حق و وسیلہ غاتا رکھ ءِ حکومت اولیت ایتک‘وزیراعلیٰ بلوچستان

کوئٹہ (خ ن) وزیراعلیٰ بلوچستان جام کمال خان تدوک آ دے صوبائی وزیر و صوبائی اسمبلی نا باسک آتون مروک آ اوڑدہی نا وخت آ اہم انگا ویل آتیا کانود سازی او آئینی وسیاسی معاملہ غاتیا تفصیل اٹ ہیت وگپ کرے۔ اوڑدہی ٹی دا ویل آ اُست خواہی نا درشانی ءِ کرے کہ ساڑی دور حکومت اٹ جتا جتا اہم انگا صوبائی ویل آتیا ریکارڈ کانود سازی کننگانے او تدوک آ ارا سال اٹی کابینہ آن کانودی مسودہ غاتا منظوری آن پد صوبائی اسمبلی آن36 بل پاس کننگانے ہراکہ نافذالعمل ءُ ہرانا سرکاری ویل آتا ایسری نا کاریم جونا ءُ نتیجہ بننگ اٹی ءُ او اُلسی مفاد آتا رکھ پک مریک، دیوان اٹ امنائی مس کہ وزیراعلیٰ جام کمال خان نا کماشی ٹی مخلوط صوبائی حکومت ہمو کل ءِ گام گیج آتے کننگ اٹی ءِ ہرا صوبہ نا مفاد اٹی ءُ، بلوچستان نا حق او وسیلہ غاتا رکھ ءِ حکومت اولیت ایتک ہراڑکن بھلو کچ اسے ٹی پُوسکن ءُ کانود آتون اوار اوار کانود آتے ٹی بدلی او ترمیم کننگانے او گرج انا رداٹ پین کانود سازی نا عمل برجا سلک ہراکہ پارلیمنٹ نا بنداوی او اولیکو زمواری ءِ، دیوان اٹ صوبائی وزیرک میر اسد بلوچ، سردار نور محمد دمڑ، میر ظہور بلیدی،میر عارف جان محمد حسنی، میر سلیم کھوسہ، نوابزادہ طارق مگسی، مٹھا خان کاکڑ، پارلیمانی سیکریٹری سردار مسعود لونی، عبدالرشیدبلوچ، دھنیش کمار، صوبائی اسمبلی نا باسک آک میر گہرام بگٹی او عبدالقادر نائل بشخ ہلکر۔