شہباز شریف مولانا فضل الرحمن اوڑدہی‘ اسہ حکمت عملی اس دوئی کننگ آ امنائی

اسلام آباد(آن لائن)قومی اسمبلی ٹی قائد حزب اختلاف میاں شہباز شریف او امیر جمعیت علمائے اسلام (ف) نا نیام اٹ اوڑدہی ٹی ہڑتوم آک اسہ حکمت عملی اس دوئی کننگ آ امنا کرینو۔ مسلم لیگ ن نا صدر شہباز شریف نا کماشی ٹی مسلم لیگ نون نا ڈل مولانا فضل الرحمان نا اُرا غا بس ڈل اتون خواجہ آصف، احسن اقبال، خواجہ سعد رفیق او ایاز صادق اوار ئسر، حوال نا رداٹ مروک آ اوڑدہی ٹی آل پارٹیز کانفرنس نا اڈ تننگ تون اوار ایلو ویل آتیا ہم ہیت وگپ کننگا۔ شہباز شریف او مولانا فضل الرحمان نا نیام اٹ مروک آ اوڑدہی ٹی اپوزیشن ءِ اسٹ کننگ نا ویل آ سجفنگا۔ حوال نا رداٹ نون لیگ نا صدر میاں شہباز شریف او جے یو آئی (ف) نا امیر مولانا فضل الرحمان نا نیام اٹ اوڑدہی ٹی دا ویل آ سجفنگا کہ اپوزیشن جماعت آتا نیام اٹ مروک آ فاصلہ غاتے کم کننگے، اوڑدہی آن پد اوار پریس کانفرنس کرسا شہبازشریف پارے کہ کل جماعت آتے اوار کرسا سلاہ کینہ نن کل اسہ جاگہ غا تولسا اے پی سی ءِ بٹنگنہ، شہبازشریف پارینے کہ اے پی سی مریک او المی مریک۔ دانا بابت کمیٹی نا باسک انا دیوان سلاہ کینہ۔ مولانافضل الرحمان پارینے کہ کل انا سلاہ ٹی آخبت نا لائحہ عمل ءِ طے کینہ ساڑی حالیت آتا خواست ءِ کہ نن اڑانگ آتے مُر کین او پارینے کہ حاصل بزنجو نا کزیت نا سوب آن چنکا جماعت آتا دیوان ءِ کینسل کننگانے۔ او پارینے کہ حکومت نا برخلاف تحریک کن کل انا سلاہ ارے اپوزیشن مشترکہ او مستحکم حکمت عملی اس جوڑ کیک اپوزیشن نا بشخ و پانٹ ملک انا مفاد اٹی اف مشترکہ او مستحکم حکمت عملی نا گرج ءِ۔ حکومت نا برخلاف تحریک آ نن اوار اُن۔