بنجائی کابینہ نا دیوان‘ نوازشریف ءِ زُو اس پدی اتنگ انا فیصلہ

اسلام آباد (آن لائن) بنجائی کابینہ مسکوہی وزیراعظم نوازشریف ءِ زُو اس پدی اتنگ نافیصلہ کرینے وخت اس کہ وزیراعظم عمران خان پارینے کہ نوازشریف ءِ پدی اتنگ حکومت نا زمواری ءِ، دا بابت اٹ کل کانودی وڑ و ڈول آتا جاچ ءِ ہلنگک، ہچ ءُ وڑ اسے نا بلیک میلنگ ءِ سگپرہ۔ تدوک آ دے وزیر اعظم عمران خان نا کماشی ٹی بنجائی کابینہ نا دیونا مس ہراٹی ملک انا سیاسی، زرگزرانی حالیت آتون اوار جتا جتا چلینج آتیا بحث کننگا، دیوان اٹ مسکوہی وزیر اعظم نواز شریف نا پدی اتنگ او مریم نواز نا کروک آ کاریم تیان خوڑتی ٹی ہیت وگپ کننگا۔ دیوان اٹ وزیرک تدوک آ دے مروک آ قومی اسمبلی نا دیوان اٹ سخت انگا لوز آتا ویل آتیا ہم ہیت کننگا۔ وزیرک پاریر کہ مسلم لیگ (ن) نا سینئر راہشون شاہد خاقان عباسی بھاز سخت ءُ بولی اس کاریم اٹ ایس او اسپیکر قومی اسمبلی نا عہدہ نا ہم خیال ءِ تختو، داڑا بنجائی وزیر فیصل واوڈا سوختہ خننگا او پارے کہ نن کرینگ بننگ کن اُلس آن ووٹ ہلتنن، قومی اسمبلی ٹی مروک آ بدزبانی نا معاملہ بھاز خراب ءِ، آخبت اٹ دن کننگا تو دانا جوان ورندی ءِ تننگک۔ بنجائی وزیر اسد عمر پارینے کہ بدزبانی نا معاملہ غا اسپیکر قومی اسمبلی اسد قیصر زوت اس ایکشن ہلوئی ءِ او بایدے دانا رکنیت ءِ ہم ایسر مروئی ئس۔ اسد عمر نا دا سلاہ نا دیوان اٹ ساڑی بشخندار آک مخ تفی ءِ کریر۔ دیوان نا بشخندار آتا پاننس ئس کہ اسپیکر قومی اسمبلی نا منصب نا خیال ءِ تخنگتو دا ننکن جوان مفک۔ فیصل واوڈا مریم نواز نا نیب پیشی نا معاملہ ءِ ہم ہرفے، او پارینے کہ مریم نواز اسہ جوڑ کروک ءُ ڈٹ اسے نا رداٹ ڈرامہ اس کرے داڑان سخت انگا ہیت دادے کہ حکومتی مشینری حرکت اٹ بتو، مریم نواز نیب دفتر نا مون آ انت اس کہ کرے داڑا کانود ءِ حرکت اٹ بروئی ئس او اودے زُو اس دزگیر کننگوسُس ولے افسوز اٹ پاوہ کہ دن متو۔ پُوسکن آ پاکستان اٹ دا وڑ نا ڈرامہ بازی تے چلینگ انگ کن ہلیپنہ۔ اُلس ننے ووٹ تبدیلی کن تسنے کانود نا حکمرانی ءِ پک کروئی تمک۔