بنجائی کابینہ احتساب عدالت و 12 ایجنڈا آئٹم نا منظوری ءِ تس
کابینہ نا کنڈ آن کابینہ کمیٹی نجکاری نا 10جولائی 2023ء نا دے اڈ ہلوک دیوان نا فیصلہ غاک ہم پک
اسلام آباد: وزیراعظم محمد شہباز شریف ناکماشی ٹی اڈہلوک بنجائی کابینہ نادیوان نا اعلامیہ ءِ جاری کننگا۔ کابینہ احتساب عدالت آتے اولسر پوسکن کننگ تون اوار 12 ایجنڈا آئٹم نا منظوری تننگا‘ بنجائی کابینہ کابینہ کمیٹی نجکاری نا 10جولائی 2023 نا اڈہلوک دیوان نا فیصلہ غاتے پک کرے‘ وزیراعظم پارینے کہ حکومت ملک اٹ براہ راست پیشن نا زرکاری ءِ ودفنگ کن Whole of the Government پالیسی آ عملدرآمد کننگ اٹی ءِ‘ آذربائیجان و پاکستان نا نیام اٹ ایل این جی نا معاہدہ پاکستان نا توانائی سلامتی کن ہم بھاز اہم مریک‘۔وزیراعظم محمد شہباز شریف ناکماشی ٹی بنجائی کابینہ نا دیوان چار شنبے نا دے وزیراعظم ہاؤس اسلام آباد اٹ اڈہلک بنجائی کابینہ وزارتِ انفارمیشن ٹیکنالوجی ناسلاہ غا صارف آتا ڈیٹا نا رکھ و انفارمیشن سسٹم نا ناروا و غیرکانودی کاریم اٹنگ نا توننگ کن ای سیفٹی بل 2023 انا پک منظوری ءِ تس۔ پاکستان اٹ کل وڑ انا آن لائن سروس، آن لائن ہلنگ‘ چندی کمپنی تے تروک کوائف و راجی رابطہ غاتا ویب سائٹ آتیا صارف آتا ڈیٹا ءِ رکھ کننگ و اونا بے موکل آن کاریم اٹ اتنگ ءِ پک کننگ کن دا کانود نارد اٹ اسہ سرجم ءُ فریم ورک اس جوڑ کننگک بل انا منظوری آن پد آن لائن زیزاریفنگ‘ سائبر بْلنگ، بلیک میلنگ کون آ پراگندہ غا ڈوہ تا وڑ تے توننگ مریک۔ بنجائی کابینہ وزارتِ انفارمیشن ٹیکنالوجی اینڈ ٹیلی کمیونیکیشن نا سلاہ غا Personal Data Protection Bill 2023 نا ہم پک منظوری ءِ تس‘ دا بل انا رد اٹ حکومت جتا جتا ادارہ و کمپنی‘ صارف آتا جند انا کوائف / ڈیٹا نا رکھ ءِ پک کیک و اونا موکل آن بیدس ہرا وڑ انا کمپنی، بندغ یا حکومتی ادارہ ءِ صارف نا موکل آن بیدس اونا کوائف ڈیٹا تننگ آرکھ خلیک۔ کانود نا رد اٹ صارف آتا نجی کوائف/ ڈیٹا ءِ رکھنگ و غاو تے چٹفنگ کن نیشنل کمیشن فار پرسنل ڈیٹا پروٹیکشن (NCPDP) جوڑ کننگک ہرا اسہ دیوانی عدالت نا وڑ اٹ مریک۔
(آن لائن)