پاکستان ڈیفالٹ نا گڑتی تیان پیشن پیش تمانے، وزیراعظم

کراچی : وزیراعظم میاں محمد شہباز شریف پارینے کہ پاکستان ڈیفالٹ نا خلیس آن پیش تمانے‘ جادو ودم کروک آ ملک انا بدخواہک بے سہب مسر‘ شونداری کن کرپشن، بجلی وگیس دزی ءِ چٹفوئی مریک‘ ورنا تے ہرمند و واکدار کروئی مریک‘ بروک آگچین کاری تے ٹی وارخواہی رسینگا تو صوبہ غاتا اواری اٹ لائخ آ ورناتے ہر سال 10 لکھ لیپ ٹاپ ایتنہ‘ ورناتے ٹی لیپ ٹاپ بشخ وپانٹ کننگ و اوفتے واکدار جوڑ کننگ نا دود اٹ بشخ ہلنگ کن کن گمر نا ہیت اسے‘ گورنر سندھ گورنر ہاؤس اٹ ورناتیکن بھاز جوان ءُ پروگرام اس بنا کرینے ہراکہ ستا کڑزک‘ سندھ انا وزیراعلیٰ صوبہ ٹی لیپ ٹاپ بشخنگ و شونداری وسیلہ فراوان کننگ کن کوشست کننگ اٹی ءِ‘ ورناتے تعلیم ترفنگ کن اخس کہ وسیلہ فراوان کننگ ناگرج ءِ بایدے فراوان کننگے‘ داڑان ملک ترندی اٹ شونداری نا کسر آ روان مریک‘ بینک آتیکن دا ہیت ءِ المی کننگے کہ چنکا کشارگر و دکاندار تیکن وام انا خاص ءُ بشخ اس جتا کننگے‘ ننے چنکا ونیامئی درجہ نا صنعت آتا آسراتی نا بست وبند کروئی مریک۔ دا خیال آتا درشانی ءِ او چار شنبے نا دے وزیراعظم لیپ ٹاپ اسکیم و وزیرِ اعظم یوتھ بزنس لونز نا رد اٹ چیک تننگ نا دود آن تران کرسا کرے۔ داوخت آ بنجائی حوالکاری وشینکاری وزیر مریم اورنگزیب، بنجائی وزیر انفارمیشن ٹیکنالوجی امین الحق، بنجائی وزیر توانائی انجینئر خرم دستگیر، گورنر سندھ کامران ٹیسوری، وزیراعلیٰ سندھ مراد علی شاہ، وزیراعظم نا ورناتا بابت خصوصی کمکار شزہ فاطمہ و صوبائی وزیرتتون اوار مار ومسڑ طالب علم آتا بھلو کچ اس ساڑی ئس۔ دود آن تران کرسا وزیراعظم شہباز شریف پارے کہ ورناتے ٹی لیپ ٹاپ بشخ وپانٹ کننگ و اوفتے واکدار جوڑ کننگ نادود اٹ بشخ ہلنگ آن ای خوش مسٹ و دا کن کن گمر نا ہیت اسے‘ اوپارے کہ سندھ انا وزیراعلیٰ صوبہ ٹی شونداری وسیلہ فراوان کننگ و لیپ ٹاپ بشخ وپانٹ کننگ کن کوشست کننگ اٹی ءِ‘ گورنر سندھ انا کنڈآن ورناتیکن گورنرہاؤس اٹ پروگرام تا بنا کننگ ہم ستا کڑزک۔ لیپ ٹاپ ہلوک مارمسڑطالب علم آتا گیشتری نا تعلقداری صوبہ نا جتاجتا علاقہ غاتیان ءِ‘ ورناتے تعلیم تننگ کن اخس کن وسیلہ فراوان کننگ نا گرج ءِ بایدے فراوان کننگے‘داڑان ملک ترندی اٹ شون ہلیک۔ نن فری لانسنگ کن پروگرام نا بناءِ کرینن۔ پاکستان نا ورناک بھاز لائخ ءُ۔ قوم ءِ مونی دننگ کن ورناتے ہنرمند و واکدار کروئی مریک۔ وزیراعظم پارے کہ کچ اٹنگا وسیلہ غاتے ٹی لائخ آ ورناتے لائخی تے نشان تننگ بھاز اہم ءِ۔

(آن لائن)