بغاوت کیس، شہباز گل اشتہاری گوندنگا،درخواست آک مسترد

اسلام آباد : ڈسٹرکٹ اینڈ سیشن کورٹ اسلام آباد پاک فوج انا برخلاف بغاوت آ وگائفنگ نا کیس اٹ پی ٹی آئی نا راہشون شہباز گل ءِ اشتہاری گوندنگا‘چار شنبے نا دے ڈسٹرکٹ اینڈ سیشن کورٹ اسلام آباد اٹ شہباز گل نا برخلاف پاک فوج انا برخلاف بغاوت آ وگائفنگ نا کیس انا سماعت مس‘ ہراٹی عدالت پد ریسہ حاضر مفننگ آ شہباز گل ءِ اشتہاری گوندانے۔ شہباز گل نا میرات آتے ضبط کننگ نا کارروائی نا بناءِ کننگانے۔ ایف آئی اے و نادرا ناکنڈآن شہباز گل نامیرات آتا رپورٹ ءِ عدالت اٹ جمع کرفنگانے‘ سماعت ناوخت آ عدالت شہباز گل نا 2 درخواست ءِ مسترد کرے۔ شہباز گل ناکنڈآن کیس انا کارروائی ءِ توننگ و ویڈیو لنک آ حاضری خلنگ نا درخواست کننگاسس۔ شہباز گل ناجوڑی نا سوب آن ویڈیو لنک حاضری نا درخواست کریسس۔ عدالت ہڑتوم آ درخواست آتے مسترد کرے۔ عدالت نا جج طاہر عباس سپرا ریمارکس تس کہ دوبہ دار نابرخلاف اشتہاری نا کارروائی ہموتم منسوخ مریک ہراتم دوبہ دار نا جند عدالت اٹ پیش مرے۔ شہبازگِل 4 ہفتہ نا پارسا ملک آن نراسس۔ شہبازگِل چالاکی کننگ اٹی ءِ۔ شہبازگِل ءِ ملک آن نرفنگانے‘ وکیل صفائی سماعت ناوخت آ عدالت ءِ پارے کہ شہبازگِل ناجوڑی ناسوب آن پیشن ہنانے نرتنے۔ داکان گڈ عدالت کیس انا سماعت ءِ 31 اگست اسکان ملتوی کرے۔

(آن لائن)