پارلیمنٹ نا اسیجائی دیوان، الیکشن ایکٹ ترمیمی بل 2023 منظور

اسلام آباد :  اسپیکر راجہ پرویز اشرف ناکماشی ٹی پارلیمنٹ نا اسیجائی دیوان اڈہلک‘ دیوان اٹ الیکشن ایکٹ ترمیمی بل 2023 ءِ پیش کننگا۔ پارلیمنٹ الیکشن ایکٹ ترمیمی بل 2023 ءِ گیشتری نا سلاہ اٹ منظور کرے و ترمیمی بل انا منظوری ءِ ٹک وار کننگا۔ نگران حکومت نا بابت ٹک 230 اٹ ترمیم کننگانے و ٹک 230 انا شیفکو ٹک 1 و 2 اٹ ترمیم کننگانے‘ ترمیم نا رد اٹ نگران حکومت ہچ ءُ پوسکن ءُ معاہدہ اس کننگ کپک‘ نگران حکومت ءِ اِرا پڑکی و گیشتری پڑکی برجا معاہدہ غاتیا فیصلہ غاتیا واکداری ہم مفک‘ نگران حکومت تون مست آن برجا ڈٹ آتیا ادارہ غاتتون ہیت کننگ نا واکداری مریک‘ ترمیم نا رد اٹ نگران حکومت مست آن برجا پروگرام و ڈٹ آتا بابت تینا واکداری تے کاریم اٹ اتنگ کیک۔ الیکشن ایکٹ اٹ سلاہی ترمیم اٹ نگران حکومت ءِ المی فیصلہ غاتیا واکداری مریک۔ بنجائی وزیر اقتصادی امور سردار ایاز صادق پارلیمان نا اسیجائی دیوان اٹ گچین کاری اصلاحات نا بل انا بابت تینا خیال آتا درشانی ءِ کرسا پارے کہ بھاز آ بندغ آتے ٹک 230 ءِ اتنگ آ اعتراض ئس دا غلط فہمی اس ئس کہ دا ٹک انا کمک اٹ نگران حکومت ءِ واکداری تننگ نا مسخت اودے بھلو وخت اسکان چلیفنگک‘ اوپارے کہ اینو ورلڈ بینک انا نمائندہ غاک کنے آ بسر ہرافتے گڑتی ئس کہ ساڑی حکومت نا مُد انا چٹنگ آن پد بھاز آ شونداری ڈٹ آتا معاہدہ غاتیا عملدرآمد امر مریک؟تعلقدار کمیٹی نا کنڈآن اسہ ہندن ءُ کسر اس کشنگے ہراڑان دا معاہدہ غاتا چر برجا سلے‘ داکان مست نگران حکومت نا واکداری تا باندات حکومت سیوتی تے منفنگ اٹ سرسہب مس‘ نگران حکومت و نگران وزیراعظم نا واکداری تا باندات آ گچین کاری اصلاحاتی کمیٹی نا دیوان چیئرمین ایاز صادق ناکماشی ٹی اڈہلک ہراٹی بنجائی وزیرکانود اعظم نذیرتارڑ، سینیٹرتاج حیدر، بیرسٹر علی ظفر وایلوفک بشخ ہلکر‘ وخت اس کہ وزیرکانود سیوتی و اپوزیشن جماعت آتا راہشون تے بریفنگ تس‘ حوالی نا رد اٹ گچین کاری اصلاحات کمیٹی نا دیوان اٹ آرٹیکل 230 نا بابت ترمیم تیا ہیت وگپ کننگا و نگران حکومت نا ودکی واکداری تیا سیوتی تا گڑتی تے ایسر کننگا‘ حوالی نا رد اٹ حکومت الیکشن ایکٹ انا ٹک اٹ ترمیم آن نگران حکومت ءِ بھاز واکداری تننگ آ سیوتی تے منفینے۔ حوالی نا رد اٹ ترمیم نا رد اٹ نگران حکومت تون برجا معاہدہ غاتا بابت کل واکداریک مریرہ‘ نگران حکومت جہانی معاہدہ کننگ کیک و مالیاتی ادارہ غاتتون ہم معاہدہ کننگ کیک ولے نگران حکومت تون پوسکن ءُ معاہدہ کننگ نا واکداری مفک‘ حوالی نا رد اٹ سیوتی تے منفنگ آن پد حکومت نگران حکومت ناواکداری تا بابت ٹک 230 ءِ بل آن کشپننگ نافیصلہ کرے۔

(مانیٹرنگ ڈیسک)