بلوچستان حکومت خولم نا 10لکھ گونی ہلنگ نا پک کروک ہدف ءِ پورو کرے

7لکھ گونی ہندی کہول آ و 3لکھ گونی پنجاب آن ہلنگ نا ہدف ئس‘ ہندا سوب آن داسہ دفعہ 144 ہرفنگانے‘ فرح عظیم

0

Get real time updates directly on you device, subscribe now.

کوئٹہ : بلوچستان حکو مت نا ترجمان فرح عظیم شاہ پارینے حکومت خولم نا 10لکھ گونی ہلنگ نا پک کروک ہدف ءِ پورو کرینے‘ 7لکھ گونی ہندی کہول آ و 3لکھ گونی پنجاب آن ہلنگ نا ہدف ئس‘ ہندا سوب آن داسہ دفعہ 144 ہرفنگانے‘ صوبہ ٹی خولم دننگ آ ہچ ءُ رکھ اس مفک‘ صوبہ غان پیشن خولم دننگ آ رکھوک خلوک مریک۔دا خیال آتا درشانی ءِ او جمعہ نا دے وزیراعلیٰ سیکرٹریٹ اٹ پریس کانفرنس نا وخت آ کرے‘ فرح عظیم شاہ پارے کہ برجا سال مارچ اٹ نصیرآباد اٹ ننا ٹیمک ساڑی ئسر۔ صوبہ ٹی خولم نا تنکی ناسوب آن خولم نا دانگ اینگ دننگ آ دفعہ 144نا رد اٹ رکھ خلنگاسس و حکومت خولم ونت انا تنکی نا مون ءِ توننگ کن صوبہ نا خولم نا گرج آتے پورو کننگ کن 10لکھ گونی خولم ہلنگ نا ہدف پک کریسس ہرادے پورو کننگانے‘ ہندا سوب آن داسہ دفعہ 144 ءِ اینک کننگانے‘ صوبہ ٹی خولم دننگ اتنگ آ ہچ ءُ رکھ اس اف ولے صوبہ غان پیشن خولم دننگ آ رکھ مریک۔ حکومت 7 لکھ گونی ہندی کہول آ و 3لکھ گونی پنجاب آن ہلسا ہدف ءِ پورو کرینے‘ ہدف نا پورو مننگ آن غریب الس ءِ فائدہ مریک‘ الس ءِ آسراتی رسیفنگ کن کوشست کننگ اٹی ان‘ بلوچستان اٹ بروک آ دے تے ٹی نت انا ہچ ءُ تنکی اس مفک۔ او پارے کہ بلوچستان اٹ نوکاپ نازہمی تا بحالی نا کاریم نا بناکننگتو تو بلوچستان 30 آن 35 سال پین پدی کاہک‘ ہندا سوب آن کل اسٹیک ہولڈر آتے نوکاپ نازہمی تا کمک کن مونی بروئی مریک تاکہ اوفتا بحالی ءِ پک کننگ مرے۔ اسہ سوج اسے نا ورندی ٹی او پارے کہ حکومت دوئی وسیلہ غاتے کاریم اٹ اتسا الس نا ویل آتے ایسر کننگ کن سنجیدہ کوشست کننگ اٹی ءِ‘ مخلوق ءِ زند انا بنداوی آسراتی تا رسیفنگ ءِ پک کننگ حکومت نا اولیت آتے ٹی اوار ءِ۔

(آن لائن)

Get real time updates directly on you device, subscribe now.

Leave A Reply

Your email address will not be published.