پولیس نا کڑد ستا کڑزک، ایف آئی آر نا ویل ءِ ہم چٹفنگک، قدوس بزنجو

کوئٹہ : وزیراعلیٰ بلوچستان میر عبدالقدوس بزنجو امن وایمنی و الس نا جان ومال انا رکھ اکن بلوچستان پولیس نا کارکڑد نا ستاءِ کرسا اومیت درشان کرینے کہ سائل آتا غاو تے دمدستی ایسر و کانود نا وڑ اٹ ایف آئی آر درج کننگ نابابت الس نا غاو تا چٹفنگ ءِ ہم پک کننگک۔ دا خیال آتا درشانی ءِ او سنٹرل پولیس آفس اٹ جوڑ ڈیٹا کمیونیکشن اینڈ کمانڈ سینٹر نا جاچ ءِ ہلنگ نا وخت آ کرے‘ ہراڑے اودے آئی جی پولیس عبدالخالق شیخ پولیس نا کارکڑد و سینٹر اٹ ساڑی آسراتی تابارو اٹ بریفنگ تس۔صوبائی وزیر داخلہ میر ضیاء لانگو ہم وزیراعلیٰ تون تُد ئس۔ وزیراعلیٰ ڈیٹا کمیونیکیشن اینڈ کمانڈ سینٹر نا جوڑ کننگ ءِ امن نا گچینی نا کنڈآ اہم ءُ پیش رفت اس گوندسا پارے کہ ساڑی دور انا خواست آتتون ہمگرنچ مننگ کن ننے ہم پوسکن آ ٹیکنالوجی آن فائدہ ہرفوئی مریک‘ خاص وڑ اٹ دہشت گردی نا چیلنج تون مون تننگ کن تینا فورس آتا کاریمی کچ اٹ ودکی ننا اولیت آتے ٹی اوار ءِ۔ حکومت پولیس نا کارکڑد اٹ پین ودکی کننگ کن کل وسیلہ غاتے فراوان کیک۔ وزیراعلیٰ دا ہیت آ زور شاغا کہ پولیس آ الس نا پت ءِ ودفنگ کن گام گیج کننگے‘ تھانہ کلچر اٹ بنداوی بدلی اتسا اودے الس دوست کننگے و چیکنگ ناوخت آ ہر حال اٹ الس نا شرف ءِ کننگے وخت اس کہ پرسجو ناوخت آ ہم دوبہ دار آتتون رویہ ءِ جوان کننگے۔ وزیراعلیٰ پولیس فورس انا شرف و عزم وحوصلہ ءِ بڑزا کننگ آ آئی جی پولیس نا سفت ءِ کرسا پارے کہ اینو نن گمر اٹ پاننگ کینہ کہ تدوک آ منہ وخت آن بلوچستان پولیس اسہ اسٹرائکنگ فورس انا وڑ اٹ مون آبسنے و وخت اتون پین گچینی بریک۔

(خ ن)