روس آن بروک آ تیل پانزدہ بیست دے ٹی سر مریک، مصدق ملک

اسلام آباد : وزیرمملکت پٹرولیم مصدق ملک پارینے کہ روس آن رعایتی نہاد آ تیل رسینگ انگ ءِ وبروک آ 15 غان 20 دے اٹ پاکستان اٹ روس انا تیل مریک۔ نجی ٹی وی نا پروگرام اٹ تینا خیال آتا درشانی ءِ کرسا وزیر مملکت پارے کہ سیاسی جماعت آتا نیام اٹ جھیڑہ غاک بایدے چٹر و سلر‘ دا وڑ تو پرچون نا دکان اس چلینگپک‘ملک امر چلینگ کیک۔ مصدق ملک پارے کہ گیس آ 1700 ارب روپئی نا پیری کروک وام ئس‘ نن گیس آ وام تے صفر کرین، ایل این جی آ ہم گردشی وام تے صفر کینہ‘ او مستی پارے کہ تاریخ اٹ اولیکو وار اِرا روسی وزیر 86 باسکی ڈل اتون اوار پاکستان آ بسر‘ روس آن رعایتی نہاد آ تیل رسینگ انگ ءِ و بروک آ 15 غان 20 دے اٹ پاکستان اٹ روس انا تیل مریک۔ وزیر مملکت پارے کہ حکومت ناکنڈآن اہم ءُ فیصلہ کننگ انگ ءِ وحالیت آتے گچین کننگ کن سخت ءُ فیصلہ کننگ انگ ءِ‘ مونی ہننگ کن ننے چنکا کاروبار کروک آتے پروموٹ کروئی ءِ‘ بجٹ اٹ چنکا کاروبار کروک آتے آسراتی تننگ آ سجفنگ انگ ءِ‘ او پارے کہننے تاپی گیس ڈٹ آن اڑزان گیس اتوئی ءِ‘ داڑا تیزی اٹ کاریم مننگ اٹی ءِ‘اوپارے کہ آٹو موٹو پالیسی جوڑ کننگ ءِ کیہی سال مسنے‘ اینو اسکان نن اسہ انڈیکیٹر نا کوراس ایکسپورٹ کننگ کتنن‘ کنا خیال دادے کہ ننا آٹو موٹو پالیسی جوان اف۔ عمران خان 190ملین پاؤنڈ سپریم کورٹ نا اکاؤنٹ اٹ شاغفے دا پیسہ غاتے پاکستان نا اکاؤنٹ اٹ بروئی ئس۔ مصدق ملک پارے کہ آئین و کانود آن چَپ بایدے ہچ اس مف۔ اوپارے کہ 9 مئی نا ویڈیو تا کمک اٹ بندغ آتے پٹسا دزگیر کننگ انگ ءِ‘ نادرا غان پک کننگ آن پد اوفتے دزگیر کننگ انگ ءِ۔

(آن لائن)