وزیر داخلہ میر ضیاءلانگو نا شار انا چندی علاقہ و مسیت آتا دورہ

کوئٹہ (خ ن) صوبائی وزیر داخلہ میر ضیاءاللہ لانگو کوئٹہ شار انا چندی علاقہ و مسیت آتا دورہ ءِ کرے‘ دا وخت آ صوبائی وزیر پارے کہ مچ آصوبہ نا مسیت آتے ٹی صوبائی حکومت ناکنڈآن پیش کروک ایس او پی تیا عملدرآمد ءِ پک کننگ آ عالم دین و الس نا منتوار ان‘ ہندی کہول آ کورونا وائرس نا کیس تا ترندی اٹ ودنگ گڑتی نا سوب ءِ، لاک ڈاﺅن آ عملدرآمد ءِ پک کننگ اٹ ننا کل انا خیرءِ۔ رکھی گام گیج آتیا عملدرآمد کرسا دا ہلوک آ ناجوڑی نا مون ءِ توننگ مریک‘ داوخت آ وزیرداخلہ تون ایڈیشنل آئی جی پولیس عبد الرزاق چیمہ و ایس ایس پی آپریشنز طارق مستوئی ہم تُد ئس۔ سرجم آن معلومدار کرسا ایڈیشنل آئی جی صوبائی وزیرداخلہ ءِ پارے کہ ہرا مسیت آتے ٹی ایس او پی تیا عملدرآمد مفننگ ءِ اوفتا منتظم آتتون دوارہ ہیت کننگک و اوفتے کورونا وائرس نا تالانی نا سوب آن حکومتی پارت واوفتیا عملدرآمد کن امنا کرفنگک۔ صوبائی وزیر داخلہ پولیس نا بڑزکو کمامدار آتے پارت کرے کہ پولیس الس اٹ ماسک بیننگ و بے گرج آن اُراتیان پیش تمپننگ نا اہمیت آن معلومدار کننگے ہرانا بنداوی مسخت الس نا جانجوڑی نارکھ ءِ۔