بلوچستان اٹی کورونا وائرس آن داتم اسکان 13 بندغ کزیت کرینو

کوئٹہ(آن لائن)کوئٹہ تون اوار مچ آ صوبہ ٹی کورونا وائرس غان زہمی بندغ آتا کچ ودنگ اٹی ءِ۔ زہمی تیٹی ڈاکٹر و طبی کارندہ غاتا بھلو کچ اس ہم ارے۔ کورونا وائرس آن داتم اسکان 13 بندغ کزیت کرینو۔ بلوچستان ٹی کورونا وائرس نا ودوک آ کیس آتیٹی اسہ بھلو کچ اس ڈاکٹر و طبی کارندہ غاتا ہم ارے۔ حوال آتا رداٹ دا تم اسکان 5 سَد ہندی کیس مون آ بسنو۔ ہرافتیٹی ڈاکٹر، سرکاری ملازم آک ہم اوار اریر۔ حوال اٹ پاننگانے کہ اسسٹنٹ کمشنر دشت، ایڈیشنل ڈپٹی کمشنر کوئٹہ ہم کورونا وائرس غان زہمی مسنو، وخت اس کہ 31 ڈاکٹر ہم فرنٹ لائن آ کاریم کرسا کورونا نا گواچی مسنو۔ زہمی ڈاکٹر آتیٹی پروفیسر ڈاکٹر جلال اچکزئی، ڈاکٹر فضل الرحمن بابر، ڈاکٹر ضیاالحق ناصر، ڈاکٹر قیسر پانیزئی، ڈاکٹر عمر ناصر، ڈاکٹر انور ناصر، ڈاکٹر عبداللہ جان، ڈاکٹر احمد علی، ڈاکٹر عجب مندوخیل، ڈاکٹر اسحاق درانی، ڈاکٹر بہاوالدین اچکزئی، ڈاکٹر جبار اچکزئی، پروفیسر ڈاکٹر سید لیاقت آغا، ڈاکٹر ارسلان، ڈاکٹر سمیہ، ڈاکٹر فرید آغا، ڈاکٹر ضیاالرحمن، ڈاکٹر صبور احمد کاکڑ، ڈاکٹر احسان شاہ، ڈاکٹر عبدالودود اچکزئی اسک اوار ءُ۔ وخت اس کہ پیرامیڈیکس کارندہ غاک ہم کورونا وائرس نا گواچی مسنو، ہرافتا بابت پاننگک کہ داتم اسکان 21 ہندن ملازم ہم اریر، ہرا چندی ہسپتال آتیٹی تینا کسبی زمواری تے پورو کرسا کورونا نا گواچی مسنو۔ ہرافتا درمان نا چرجوئی برجا ءِ۔