تعلیمی ادارہ غاتیٹی کورونا نا رکھوک گام گیج و ایس او پیز آتیا سختی ٹی عملدرآمد کرفنگے‘ جام کمال
Get real time updates directly on you device, subscribe now.
کوئٹہ (خ ن)وزیراعلیٰ بلوچستان جام کمال خان نا کماشی ٹی اسہ بڑزکو کہولی دیوان اسے ٹی تعلیمی ادارہ غاتیٹی کورونا وائرس نا ساڑی حالیت نا جاچ ءِ ہلسا ہندا ادارہ غاتے کوروانا وائرس نا رکھوک گام گیج و ایس او پیز آتیا سختی ٹی عملدرآمد کرفنگ نا فیصلہ کننگا۔ دیوان اٹ پارلیمانی سیکریٹری برائے جانجوڑی ڈاکٹر ربابہ بلیدی، ایڈیشنل چیف سیکرٹری داخلہ حافظ عبدالباسط، سیکریٹری جانجوڑی دوستین جمالدینی، سیکریٹری ہائر ایجوکیشن ہاشم غلزئی، ڈی جی صحت، ڈبلیو ایچ او نا نمائندہ، پبلک ہیلتھ و عمومی جانجوڑی نا ماہر تتون اوار ایلو کمامدار آک بشخ ہلکر۔ دیوان ءِ اڈ ہلوک کمامدار آتا کنڈآن تروک آ بریفنگ اٹ پاننگا کہ تعلیمی ادارہ غاتیٹی ٹیسٹنگ نا کچ اٹ ودکی کرسا ہڑدے نا بنداو آ 1500 آن زیات ٹیسٹ کننگ انگ ءِ۔ او دا وخت اسکان کروک آ 4156 ٹیسٹ آتیٹی 382مثبت بسنو، دیوان اٹ تعلیمی ادارہ غاتیٹی کورونا وائرس اٹ ودکی آ اُست ہسونی نا درشانی ءِ کرسا ٹیسٹنگ نا کچ اٹ ودکی نا فیصلہ کننگا۔