سرانان، روڈ تفنگ آ کاریم کروک مزورکار کار آتیا جلہو، 5 زوال

کوئٹہ، پشین، سرانان سلیمان زئی ٹی ڈبل روڈ تفنگ آ کاریم کروک مزورکار آتیا نادرست دوبہ دار آتا سم کاری آن 5 مزورکار زوال و اسہ بندغ اس بھاز ٹھپی مس دوبہ دار آک سم کاری آن پد نرار۔ سُم کاری نا سوب آن علاقہ ٹی بھاز خلیس وبھیم تالان مس۔ واقعہ نا حوال رسینگ تون ہندی انتظامیہ جاگہ غا سر مس و لاش و ٹھپی تے ہسپتال آ گدریفے۔حوالی نارد اٹ تدوک آ دے سرانان سلیمان زئی ڈبل روڈ نا تفوئی کاریم کروک خواری کش و تفوئی مشینری آ نادرست آ سلہہ بند بندغ آک سُم کاری کریر ہرانا سوب آن بنائی حوال نا رِد اٹ 5 مزورکار زوال و اسٹ اس بھاز ٹھپی مس۔ حوالی نارد اٹ جلہو گیر آک سڑک نا تفوئی کاریم کروک مزور و مشینری آ سم کاری کریر ہراکان پد علاقہ ٹی خلیس وبھیم تالان مس۔ لاش و ٹھپی ءِ ہسپتال آگدریفنگا۔ داسکان جلہو نا سوب معلوم متنے۔وزیراعلیٰ بلوچستان میر سرفراز بگٹی ضلع پشین نا علاقہ سرانان بازار اٹی کسر نا تفوئی کاریم کروک مزورکار آتیا دہشت گرد جلہو نا سخت انگا لوز آتے تی مذمت ءِ کرسا پارے کہ اسہ وار ولدا کودک آ پاکستانی تے دہشت گردی نا نشان جوڑ کرسا شہید کننگانے، دہشت گرد آک انسانیت نا کل سیم تیان جپانو۔ وزیراعلیٰ پارے کہ خواری کش مزورکار آک تینا چناتے ولفنگ و رزق اکن ملک و صوبہ نا شون و تفوئی کاریم ٹی تینا کڑد ءِ ادا کننگ ئسر، اوفتے شست کننگ دہشت گردی تا لغور و بیدادی نا پاش آ شاہدی ءِ۔ کودک آ شاری و خواری کش پاکستانی تا دتر وہیفوک آک ہچ رعایت نا حقدار افس۔ میر سرفراز بگٹی پارے کہ دہشت گرد آتے سما مرے کہ کودک آ پاکستانی تا شہادت ننا عزم ءِ نزور کپک بلکن پین سوگو کیک۔ بلوچستان اٹی امن، شون و الس نا رکھ اکن ریاستی ادارہ غاک پورو واک اٹ دہشت گرد آتا برخلاف کارروائی کیرہ۔ او پارے کہ دہشت گردی نا برخلاف جنگ داسہ فیصلہ کن ریسہ اٹی ءِ‘ دہشت گرد و اوفتا کمکار آتے امر کہ مرے کانود نا مون آ سلفنگک۔ بلوچستان اٹی کودک آشاری تا دتر اٹ ہولی گوازی کروک آتیکن ہچ ءُ ہند اس اف۔وزیراعلٰی شہیدآتا پدخاہوت آتتون است ہسونی و ہمدردی نا درشانی کرے و پارے کہ دا ڈکھ انا ساہت اٹی حکومت شہید آتا پدخاہوت آتتون سلوک ءِ۔ او شہیدآتا درجہ غاتا بڑزی کن دعا کرسا پدخاہوت آتیکن صبرِ جمیل و ٹھپی خواری کش نا دراخ جوڑی کن دعا کرے۔