مسلم لیگ نواز شریف آ سیاست کرے، عمران خان

اسلام آباد (آن لائن) وزیراعظم عمران خان نواز شریف ءِ پدی اتنگ کن کانودی کسر تے دوئی کننگ نا پارت کرسا پارینے کہ عدالت آتے درکار آ بندغ آتے پدی اتنگ حکومت نا زمواری ءِ۔ حوال نا رداٹ وزیراعظم نا کماشی ٹی گچین ءُ دیوان اس مس ہراٹی حکومتی او پارٹی ترجمان بشخ ہلکر۔ دیوان نا وخت آ پارلیمنٹ اٹ قانود سازی نا بابت ترجمان بریفنگ تس۔ داڑان بیدس دیوان اٹ ساڑی سیاسی حالیت آتیٹی اپوزیشن نا بیانیہ نا بابت حکمت عملی او نواز شریف ءِ ڈیہہ آ پدی اتنگ نا بابت گام گیج آتیا سلاہ کننگا۔ دیوان آن تران کرسا  وزیراعظم عمران خان پارینے کہ عدالت آتے درکار آ بندغ آتے پدی اتنگ حکومت نا زمواری ءِ۔ نواز شریف ءِ پدی اتنگ کن کانودی کسر تے دوئی کننگے۔ وزیراعظم پارینے کہ مسلم لیگ (ن) نواز شریف نا جانجوڑی آ سیاست کرے، نن اپوزیشن نا بلیک میلنگ اٹ بفنہ۔ اپوزیشن نا فوکس ملکی مفاد اٹ اف وخت اس کہ شریف آتا مقدمہ غاتیان خلاسی دوئی کروئی ءِ۔ حوال نا رداٹ دیوان اٹی قومی اسمبلی ٹی فیٹف کانود نا منظوری نا بابت اٹ حکمت عملی آ ہیت وگپ کرے۔ وزیراعظم ترجمان آتے ملکی زرگزرانی حالیت آتے ٹی جوانی اتنگ  نا پارت کرے او پارے کہ زرگزران نا بابت فیصلہ غاتا بھرم آک بنا مسنو۔ داسہ جوان زرگزرانی اعشاریہ نا بھرم تے اُلس اسکان سر کننگ ءِ۔ داکان بیدس وزیراعظم عمران خان پارینے کہ چین تون تعلقداری ءِ مستحکم کننگ نا اہمیت ایتک، چین او پاکستان ہڑتوم آ ٹارگٹ او مسخت آک ءُ۔ دا خیال آتا درشانی ءِ او توانائی، مواصلات، کشت وکشار، سائنس و ٹیکنالوجی، مالیاتی او صنعتی سیکٹر تون تعلقداری تخوک آ چین نا 10 کل آن گچین آ کمپنی تا ڈل آک ہیت و گپ کرسا کرے۔ ہرافک وزیراعظم ہا ؤ س اٹ اوڑدہی کریر۔ چینی ڈل پاکستان اٹ چینی سرمایہ کار او کاروباری کمیونٹی ءِ آسراتی تننگ اٹ اُست خواہی تخنگ آ وزیراعظم نا منتواری ءِ ہرفے۔ ڈل ساڑی حکومت نا کاروبار دوست پالیسیک خاص کر کاروبار آسانی تیا اُست خواہی نا درشانی ءِ کرے۔ او پاکستان اٹ جتا جتا سیکٹر تے ٹی کاروبار ءِ پین جوان کننگ او سرمایہ کاری ٹی پین ودکی کننگ نا اُست خواہی تخک۔