بلوچستان حکومت نا قومی اسمبلی ٹی ہم صوبہ نا نشست آتیٹی ودکی نا خواست

0

Get real time updates directly on you device, subscribe now.

کوئٹہ (خ ن) وزیراعلیٰ بلوچستان جام کمال خان نا کماشی ٹی صوبائی حکومت اٹ اوار انگا سیاسی جماعت آتا اوار انگا  پارلیمانی کمیٹی نا اڈ ہلوک دیوان اٹ قومی اسمبلی ٹی بلوچستان نا نشست آتے ٹی ودکی نا خواست کننگانے، دیوان اٹ حکومتی جماعت آک بلوچستان عوامی پارٹی، پاکستان تحریک انصاف، عوامی نیشنل پارٹی، ہزارہ ڈیموکریٹک پارٹی، بی این پی عوامی او جمہوری وطن پارٹی نا اسمبلی نا باسک آک بشخ ہلکر۔ دیوان اٹ بلوچستان اسمبلی نا نشست آتے ٹی ودکی ءِ جوان گوندسا پارے کہ ہراوڑ سینٹ اٹ بلوچستان اسمبلی نا نشست آتے ٹی ودکی نا تحریک ءِ پیش کرسا منظور کننگا ہندن قومی اسمبلی ٹی بلوچستان نا نشست آتے ٹی ودکی کننگے، دیوان اٹ کل انا سلاہ ٹی پک کننگا کہ قومی اسمبلی ٹی صوبہ نا نشست آتے ٹی ودکی نا قراردار صوبائی اسمبلی ٹی پیش کننگک او صوبائی اسمبلی ٹی اپوزیشن ءِ ہم قومی اسمبلی ٹی نشست آتے ٹی ودکی نا کوشست آتے ٹی اعتماد اٹ ہلنگک۔ دیوان اٹ فیصلہ کننگا کہ بلوچستان آن تعلق تخوک آ قومی اسمبلی وسینٹ نا باسک آک،صوبائی حکومت نا سلاہ نا مخ تفی نا دوئی کننگ کن ملک انا ایلو سیاسی جماعت آتون رابطہ کینہ وخت اس کہ قومی او صوبائی کہول آ صوبہ نا جماعت آتا باسک آتا پارلیمانی کمیٹی اس جوڑ کننگک۔ او وخت آ تینا خیال آتا درشانی ءِ کرسا وزیراعلیٰ پارے کہ بلوچستان نا رقبہ ملک انا کل رقبہ نا 44 درسد ءِ ہرا تینا جغرافیائی محل وقوع او قدرتی وسیلہ غاتا بابت اٹ ملک انا اہم انگا صوبہ ءِ، او پارینے کہ بلوچستان نا ویل آتا اسہ اہم ءُ سوب اس قومی اسمبلی ٹی کچ اٹ انگا نمائندگی ءِ، صوبہ نا بنجائی کہول آ جوان نمائندگی المی ءِ، ہرا صوبہ نا ویل آتے جوان وڑ اٹ مون آ اتنگ کیر۔ وزیراعلیٰ زور شاغسا پارے کہ بلوچستان نا ویل آتا ایسری او پد تمننگ نا ایسری قومی اسمبلی ٹی صوبہ نا نشست آتے ٹی ودکی نا کمک اٹ ممکن ءِ۔

Get real time updates directly on you device, subscribe now.

Leave A Reply

Your email address will not be published.