بنجائی کابینہ نا دیوان اینو بٹنگ انگا‘11 ٹکی ایجنڈاس جاری کننگا

اسلام آباد (آن لائن) وزیر اعظم عمران خان بنجائی کابینہ نا دیوان ءِ اینو بٹنگا دا بابت اٹ یانزدہ ٹکی ایجنڈا اس جاری کننگا۔ کابینہ دیوان دوانزدہ بجہ غا وزیر اعظم ہاؤس اٹ مریک، بھاز آ وزیر تے کابینہ ڈویژن تون ویڈیو لنک انا کمک اٹ کابینہ دیوان اٹ بشخ ہلنگ نا پارت کرے۔ کابینہ ملکی سیاسی، زرگزرانی او سلامتی نا حالیت آتیا سجفک، بنجائی کابینہ اپوزیشن نا برخلاف سیاسی محاذ ءِ ترند کننگ آ ہم سلاہ کیک، بنجائی کابینہ نوازشریف ءِ ڈیہہ آ پدی اتنگ کن پک ءُ سلاہ اس کیک، حکومتی لیگل ٹیم کابینہ ءِ نوازشریف نا پدی اتنگ کن آپشن آتیا بریفنگ ایتک، کابینہ امارات اسرائیل معاہدہ نا نتیجہ او اثر تا جاچ ءِ ہلیک، وزیر خارجہ شاہ محمود قریشی کابینہ ءِ دورہ چین آ اعتماد اٹ ہلیک۔ ایجنڈا نا رداٹ بنجائی کابینہ 61 کُن خور او بیدس کُن خور گڑاتیا پاکستان اسٹینڈرز اینڈ کوالٹی کنٹرول اتھارٹی نا شناختی مہر ءِ پک عائد کننگ نا منظوری ایتک۔ ایجنڈا نا رداٹ کابینہ ءِ پیپرا رولز آتا اطلاق سر تعمیراتی ڈٹ آتیا اثر تیا بریفنگ ایتک، کابینہ مانیٹری اینڈ فسکل بورڈ اٹ ماہر زرگزران نا تعیناتی نا منظوری ایتک۔ دیوان اٹ بلوچستان اٹ انسداد دہشتگردی ایکٹ نا رداٹ ایف سی نا خدمت آتے ہلنگ او کابینہ ذیلی کمیٹی برائے ڈسپوزل آف لیجسلیٹو کیس آتے کن فیصلہ غاتے ٹی توثیق کیک، بنجائی کابینہ اقتصادی رابطہ کمیٹی نا 12 اگست نا فیصلہ غاتے ٹی توثیق ہم کیک وخت اس کہ وزیرخارجہ شاہ محمود قریشی کابینہ ءِ دورہ چین آ اعتماد اٹ ہلیک۔ دیوان اٹ نوازشریف نا ڈیہہ آ پدی اتنگ نا پک انگا سلاہ او حکومتی لیل ٹیم جتا جتا آپشن آتیا بریفنگ ایتک وخت اس کہ کابینہ متحدہ عرب امارات او اسرائیل معاہدہ نا جاچ ءِ ہلیک۔