قومی اسمبلی، اینٹی منی لانڈرنگ بل 2020ء گیشتری نا سلاہ اٹ منظور

اسلام آباد (آن لائن)قومی اسمبلی اینٹی منی لانڈرنگ بل 2020 گیشتری نا سلاہ اٹ منظور مس۔ اپوزیشن نا کنڈ آن بل انا مخالفت ءِ کننگا۔ اینٹی منی لانڈرنگ بل ءِ ڈاکٹر بابر اعوان پیش کرے اوڑا ہیت وگپ کرسا پاکستان پیپلز پارٹی نا بنجائی راہشون و مسکوہی وزیر اعظم راجہ پرویز اشرف پارینے کہ دا بل اٹ دزگیری نا اختیار ءِ اسہ جاست و پاستی ادارہ اسے ایتنہ تو دا ظالمانہ ءُ کانود اس جوڑ مریک، دا مون انگا کانود ءِ نن انسانی حق آتے اسہ کنڈ کرسا انتئے جوڑ کننگ اٹی اُن۔ بیدس وارنٹ آن کس اسے دزگیری نا اختیار تننگ سہی اف۔ منی لانڈرنگ ءِ ہم دا کانود نا کمک اٹ نیب آ راہی کننگ انگ ءِ۔ راجہ پرویزاشرف پارینے کہ ہراتم سپریم کورٹ ہم نیب آن اسہ کُنڈ ءِ، اپوزیشن اینٹی منی لانڈرنگ نا دا بل نا مخالفت ءِ کیک۔ پاکستان مسلم لیگ ن نا راہشون محسن شاہنواز رانجھا پارینے کہ ہرا ترمیم آتے حکومت دا بل اٹ پیش کننگ اٹی ءِ گیشتری او اپوزیشن نا سلاہ ٹی ءِ۔ نن قومی سلامتی نا خاطر آن بل آتے سپورٹ کینہ تو حکومت این آراو نا دوبہ خلیک۔ مسہ ترمیم آتے داسہ ہم ننا ہلنگتو۔ ننا مسہ ٹک ءُ، عاملہ ٹی شاہدی تننگ نا زمواری جتا ءِ، نیب اٹ جتا ءِ، شاہنواز رانجھا پارینے کہ نیب اٹ شاہدی تننگ دوبہ دار نا زمواری ءِ۔ حکومت دا کانود اٹ  نیب نا وڑ وار وار شاہدی تے دوبہ دار آ شاغنگ خواہک داڑا بنجائی وفاقی وزیر برائے پارلیمانی امور ڈاکٹر بابر اعوان پارینے کہ پاکستان نا قومی سلامتی نا قانون سازی آ ہچ ءُ اڑانگ اس سگپنہ۔ قومی سلامتی نا اسہ تاریخی حوالہ اودے ہراتم بھارتی قومی سلامتی نا سلاہکار بیدس ویزہ آن پاکستان آ بس بھارتی قومی سلامتی مشیر بیدس قومی سلامتی نا ادارہ غاتا کلیئرنس آن پاکستان آ بس۔ اگہ دزگیری کروک آ اتھارٹی نا اختیار ءِ پین جوان کروئی ءِ تو تولسا جوڑ کینہ۔ مسلم لیگ ن نا شزا فاطمہ خواجہ پارے کہ اینٹی منی لانڈرنگ بل اٹ شاہدی تے دوبہ دار آ شاغنگ اسلام نا برخلاف ءِ۔ اسلامی نظریاتی کونسل نیب نا کنڈآن بار شاہدی دوبہ دار آ شاغنگ ءِ غیر اسلامی پن کننگانے۔ بنجائی وزیر کانود ڈاکٹر فروغ نسیم پارینے کہ پارلیمانی نگرانی اگہ ایتنہ تو اختیار آتا ادارہ غاتا بشخ و پانٹ سلپک دادے نن آخا پی پی پی دور اٹ ترمیم شاغنگاسُس۔ نیب نا بار شاہدی جتا ءِ، عاملہ نا جتا ءِ۔ دا کانودی بنداوی انسان نا برخلاف اف۔ داڑان بیدس قومی اسمبلی نا دیوان ءِ غیر معینہ مدت اسکان ملتوی کننگا۔