کورونا غان پد ہم بینک ڈیپازٹ تاریخ نا بڑز انگا کچ آ سرمس، اسٹیٹ بینک

اسلام آباد (اے پی پی) ملک اٹی کوویڈ۔ 19 نا تنکی آن پد ہم بینک آتا ڈیپازٹ 16.12 کھرب روپئی نا بڑزکو انگا کچ آ سرمس۔ کورونا وائرس تنکی ٹی حکومت ءِ جان جوڑی نا ویل آتا ایسری کن 11 کھرب روپئی نا وام تیان پد ہم بینک آتا ڈیپازٹ 16 کھرب روپئی آن گدرینگانے۔ اسٹیٹ بینک آف پاکستان (ایس بی پی) نا رپورٹ نا رداٹ مارچ آن جولائی 2002ء ٹی بینک ڈیپازٹ اٹی 1.3 کھرب روپئی نا پیدوار ودکی مسنے۔ رپورٹ نا رداٹ 30 جون 2020ء آ چٹوک آ مالی سال اٹی پردیسی پاکستانی تا کنڈآن 23.10 ارب ڈالر نا ترسیلات زرانا ہلنگ ہم بینک ڈیپازٹ آتیٹی ودکی نا اسہ اہم ءُ سوب اسے۔ پردیسی پاکستانی تا کنڈآن مون تروک آ ترسیلات زر ءِ ہندی ہلوک آک بینک اکاؤنٹ آتیٹی پاکستانی روپئی ٹی بدل کرسا گدریفنگانے ہراڑان ڈیپازٹ آتا کچ اٹ ودکی مسنے۔ رپورٹ نا رداٹ تدوک آ مالی سال اٹی پاکستان ءِ 23.1 ارب ڈالر نا ترسیلات زر ملانے وخت اس کہ برجامالی سال انا بناء آ جولائی 2020ء ٹی ترسیلات زر انا ہلنگ نا کچ 2.76 ارب ڈالر نا ریکارڈ کچ اسکان ودانے۔ نیکسٹ کیپٹل نا منیجنگ ڈائریکٹر مزمل اسلم پارینے کہ لاک ڈاؤن و کوویڈ۔ 19 نا سوب آن کاروباری تپہ و دیہاڑی دار تپہ نا کٹیا نا ذریعہ بھاز زہمی مس ہرانا تدارک کن حکومت کوویڈ۔ 19 نا زرگزرانی اثرآتے کم کننگگ و مخلوق نا کمک کن اسہ بھلو ریلیف پیکج اسے نا رداٹ مالی کمک فراوان کرے ہرانا سوب آن ہم بینک ڈیپازٹ آتیٹی ودکی مسنے۔ اوپارے کہ حکومت الس و کاروباری و صنعتی بشخ آتیکن زرگزرانی بحالی ٹی کمک تننگ مرے۔ اومستی پارے کہ حکومت کاروبار و صنعت نا بجلی نا بل ءِ ہم تس ہرا براہ راست بینک آتے تننگا داوڑاٹ ہم بینک ڈیپازٹ آتیٹی ودکی مسنے۔