چاغی ٹی تینا خود آن ودفوک آ کبینی، ہر گڑا نا نہاد آسمان ءِ سر مس،الس نا پوہاڑ

چاغی ٹی تینا خود آن ودفوک آ کبینی نا بادشاہی ءِ‘ پیٹرول و ڈیزل نا نہاد آتا ودکی آن پد کنوئی آ گڑاتا نہاد آک آسمان ءِ سرمسنو الس نا وس جواب تسنے۔ کبینی الس نا مخ ءِ پرغانے، کمامدار آک نوٹس ہلیر۔ سرجم حوال آتا رِد اٹ پیٹرول و ڈیزل نا نہاد آتا ودکی آن پد چاغی ٹی کبینی ٹی بے کچ ودکی مسنے، چاغی ٹی پرائس کنٹرول نا کنڈ آن چیک اینڈ بیلنس مفننگ نا سوب آن کٹیا کار و دکاندار آک شاری تیان منشا نا نہاد ہلنگ اٹی ءُ۔ چاغی ٹی بورہ‘ دال، تیل، برنج، سوزی و فروٹ کبین نہاد آتیا بہا مننگ اٹی ءُ۔ السی تپہ غاک پارینو کہ چاغی انتظامیہ نا کنڈ آن چیک اینڈ بیلنس مفننگ نا سوب آن کٹیاکار پوریاگر آک تینا منشا نا ریٹ جوڑ کرسا الس ءِ لُٹنگ اٹی ءُ و سرکاری ریٹ ءِ کس منپک۔ چاغی ٹی قصاب آک کبین نہاد آ سو بہا کننگ اٹی ءُ، چاغی ٹی شاریک اخباری نمائندہ غاتتون ہیت وگپ کرسا پاریر کہ چاغی بازار نا کیہی دکاندار آتا گڑاک ایکسپائر مسنو خاص وڑ اٹ نیشنل و شان کمپنی نا مصالحہ، ملک پیک‘ ایرانی شربت آک‘ چاغی انتظامیہ نا کنڈ آن دکاندار تے یلہ النگانے‘ جانجوڑی کن نسخان نا سوب و بے میعاد گڑاک لس وڑ اٹ بہا مننگ اٹی ءُ۔ اسہ کنڈ آ حکومت نا کنڈآن ہڑدے نا بنداو آ گڑاتا نہاد آتیٹی ودکی کننگک تو ایلو کنڈ آ چاغی نا پوریاگر آتا تینا خود آن جوڑ کروک کبینی الس نا مخ ءِ پرغانے۔ چاغی شار اٹی کنوئی گڑا تا نہاد آک آسمان ءِ سرمسنو۔ چاغی نا دکاندارٓک ہر گڑا نا تینا منشا نا نہاد خلسا الس ءِ لُٹنگ اٹی ءُ، چاغی ٹی چیک اینڈ بیلنس نا کانود مفننگ ناسوب آن پال‘ بیکری، قصاب و سوزی بہا کروک آتا دکان تے ٹی ہچ سَفائی اف۔ السی تپہ غاک ڈی سی چاغی جہانزیب نور شاہوانی و اسسٹنٹ کمشنر چاغی میر طاہر خان سنجرانی آن خواست کرینو کہ چاغی ٹی کنوئی گڑا تا نہاد آتیٹی تینا خود آن جوڑ کروک کبینی و جانجوڑی اصول آتے لتاڑنگ نا نوٹس ہلنگے تاکہ چاغی نا الس ءِ دا مصنوعی کبینی آن نجات رسینگ کے۔ چاغی (نامہ نگار)