ودوک آ آبادی چیلنج آتتون مون تننگ کن ڈٹ بندی نا گرج ءِ،پرنس آغا عمر احمدزئی

پاپولیشن ویلفیئر ڈیپارٹمنٹ نا پارلیمانی سیکرٹری پرنس آغا عمر احمدزئی، سیکرٹری پاپولیشن ویلفیئر ظفر بلیدی، یو این ڈی پی نا ذوالفقار درانی، ڈاکٹر عطاء الرحمن، یو این ایف پی اے نا سعدیہ عطاء، ذوالقراء درانی، امبرین مینگل، ڈپٹی ڈائریکٹر پاپولیشن ناصر خان عطاء الرحمن خلجی اسک پارینو کہ آبادی ٹی ترندی اٹ مروک آ ودکی آن ودی مروک آ چیلنج آتتون گچین وڑاٹ مون تننگ کن جوان ڈٹ بندی نا گرج ءِ، ملکی شونداری و شونہالی کن المی ءِ کہ ہر بندغ ءِ بریبر وارخواہی تننگے و ورناتا لائخی تے مثبت کسر اٹ کاریم اٹ اتنگے۔ جہانی کہول آ آبادی نا دے ءِ اڈتننگ نا مسخت آبادی نا بابت چیلنج آتا بارواٹ معلومداری ودی کننگ، مدامگی شونداری نا دوئی کننگ کن کوشست آتے مونی دننگ و گچین آخبت کن اواری اٹ گام گیج آتا اہمیت ءِ تالان کننگ ءِ، پاپولیشن ویلفیئر ڈیپارٹمنٹ برامی جوڑی تے خاہوتی ڈٹ بندی (فیملی پلاننگ) نا بارواٹ راہشونی کننگ ءِ و اوفتے فیملی پلاننگ کن کاریم اٹ اتوک آ گڑاتا مفت فراوانی ءِ پک کننگ انگ ءِ۔ دا ہیت ءِ او جمعہ نادے آ پاپولیشن ویلفیئر ڈیپارٹمنٹ و یو این ایف پی اے نا کنڈ آن جہانی دے آبادی نا وخت آ ہندی ہوٹل اسے ٹی اڈ ہلوک دود آن تران کرسا پاریر۔ دود آن گورنر بلوچستان جعفر خان مندوخیل ہم تران کرے وخت اس کہ دود اٹی صوبائی وزیر میر عاصم کرد گیلو، صوبائی اسمبلی نا باسک ڈاکٹر نواز کبزئی اسک ہم بشخ ہلکر۔ او پاریر کہ جہانی آبادی دے ءِ اڈتننگ نا بنا 1989ء اٹی اقوام متحدہ کریسس، دا دے انا مسخت آبادی نا بابت ویل، تولیدی جان جوڑی، زالبول و ورناتا حق، خاہوتی ڈٹ بندی، آب اٹ جان جوڑی و تعلیم و مدامگی شونداری نا بابت جہانی کہول آ شعور تالان کننگ ءِ، دا سال ہم اقوام متحدہ ورناتے واکدار کننگ و اوفتا آخبت نا بابت آجو فیصلہ کننگ نا بریبر وارخواہی تننگ آ زور شاغانے۔ او پاریر کہ ودوک آ آبادی ءِ بیرہ اسہ ویل اس تکنگ نا جاگہ غا تعلیم، چاہنداری و گچین جان جوڑی نا آسراتی تا کمک اٹ قومی شونداری نا واک اٹ بدل کننگ وخت انا اہم گرج ءِ، پاکستان دنیا نا زیات آبادی والا ملک آتیٹی اوار ءِ، ہراڑے ساڑی مردم شماری نا رداٹ آبادی 24 کروڑ آن گدرینگانے، آبادی ٹی پدریسہ ودکی نا سوب آن جان جوڑی، تعلیم، روزگار، ہنکین، ساف دیر، ٹرانسپورٹ و ایلو المی آسراتی تا خواست اٹی نمان ودکی مننگ ءِ۔ او پاریر کہ جہانی آبادی دے دا راستکی نا یات ترفک کہ آخبت نا شونہالی نا دارومدار آبادی ٹی ودکی ءِ گچین ڈٹ بندی، انسانی شونداری، آب اٹ تعلیم، گچین جان جوڑی و بریبر وارخواہی تا کمک اٹ قومی وال اٹ بدل کننگ اٹی ءِ۔ او دا سال انا سرحال ”ورناتا اومیت و آرزو تے اینو و آخبت کن حقیقت نا دروشم اس تننگ” نا حوالہ ءِ ترسا پارے کہ ورناک ہرملک انا نہادی میرات مریرہ، اوفتے آب اٹ تعلیم، گچین جان جوڑی نا آسراتی، کسبکاری نا وارخواہی و عزت نا روزگار نا فراوانی نا کمک اٹ ملک انا شونداری ٹی پبی بشخ ہلوک جوڑ کننگ مریک۔ او پارے کہ پاکستان دنیا نا ہمو ملک آتیٹی اوار ءِ ہراڑے آبادی ٹی ترندی اٹ ودکی مننگ ءِ ہرا ملک انا کچ اٹ وسیلہ، تعلیمی و طبی آسراتی، روزگار نا وارخواہی و بنداوی خذمت آتیا ودکی زور انا سوب جوڑ مرسا کننگ ءِ۔ او پاریر کہ دا ویل آتا ایسر ی کن آخبت نا پالیسی، کاریم اٹ اتوک گام گیج و دوئی وسیلہ غاتا گچین کاریم اٹ اتنگ نا گرج ءِ تانکہ آبادی ءِ ملک انا شونداری کن اسہ مثبت واک اس جوڑ کننگ مرے۔ او پاریر کہ آبادی نا ویل اتون مون تننگ کن راج انا غٹ تپہ غاتے تینا کڑد ءِ ادا کننگ نا گرج ءِ۔ او سول سوسائٹی، میڈیا، عالم دین و سکالر آتے پاریر کہ آبادی نا ترندی اٹ ودنگ ءِ توننگ کن الس اٹ شعور و آگاہی ودی کننگ کن گچین کڑد ادا کیر۔ او پارے کہ اسیجائی کوشست آتے اٹ مدامگی شونداری، زرگزرانی سوگوی و الس نا زند انا آب اٹ گچینی نا ہدف آتے دوئی کننگ مریک۔ او پاریر کہ بریبر آبادی ملکی شونداری، زرگزرانی سوگوی و الس ءِ بنداوی آسراتی تا فراوان بھاز اہم ءِ۔ او پاریر کہ جہانی آبادی دے ءِ ہندن ءُ وخت اسے ٹی اڈتننگ انگ ءِ ہراتم دنیا نا آبادی ہشت ارب آن گدرینگانے و کنشت‘ روزگار، جان جوڑی، تعلیم، ہنکین، سفا انگا دیر و ایلو بنداوی آسراتی تا ودوک آ گرج حکومت و پالیسی جوڑ کروک آتیکن پوسکن ءُ چیلنج اس ودی کرینے، چاہندار آتا رداٹ آبادی نا ترندی ودکی آن وسیلہ غاتیٹی بریبر ودکی مفننگ نا سوب آن زرگزرانی و راجی تنکی پین ودنگ کیک۔