حکومت شفاف و قاعدہ ئی برآمدآتا مونی دننگ کن سنبرینگوک ءِ،بنجائی واپار وزیرجام کمال خان

بنجائی وزیرِ واپار جام کمال خان تون پاکستان کارپٹ مینوفیکچررز اینڈ ایکسپورٹرز ایسوسی ایشن نا ڈل اس اوڑدہی کرے و اودے علاقائی واپاری اڑاند و جہانی سپلائی چین اٹ اڑاند آن غالی نا صنعت ءِ مون تروک مشکل آتا بارواٹ معلومدار کرے۔ جمعہ نا دے آجاری بیان نا رداٹ اوڑدہی ٹی وزیرِ واپار دُو اٹ جوڑ کروک غالی تا برآمد ءِ ودفنگ و جہانی گوبر ءِ گچین کننگ نا گام گیج آتیا سرجمی اٹ ہیت و گپ کرے و پاکستانی غالی تا جہانی منڈی تیٹی رسینگ و برآمدی گوبر ءِ ودفنگ کن پالیسی گام گیج آتا جاچ ءِ ہم ہلک۔ ڈل علاقائی واپاری اڑاند و جہانی سپلائی چین اٹ اڑاند آن غالی نا صنعت ءِ مون تروک مشکل آتا بارواٹ وزیرِ واپار ءِ معلومدار کرے۔ ڈل پارے کہ کاروبار دوست و پیش گوئی نا قابل پالیسی فریم ورک برآمد آتا مون آ دننگ کن المی ءِ۔ جام کمال پارے کہ حکومت شفاف، قاعدہ غا تالان و زرکار دوست پالیسی تا کمک اٹ برآمد آتا مونی دننگ کن سنبرینگوک ءِ، وزارت واپار صنعت نا سلاہ تیا تعلقدار ادارہ غاتتون سلاہ ومشورہ غان پد عمل کروک ایسر اس تیار کیک۔ بنجائی وزیر پارے کہ پاکستان نا برآمدی سج پام ویلیو ایڈیشن، برآمدی صنعت، برانڈنگ و جہانی ویلیو چینز اٹ اوار مننگ آ چکار ءِ، حکومت پرائیویٹ بشخ انا کمک اٹ واپار اٹ بروک اڑاند آتے مُر کرسا برآمد آتیا تالان مدامگی شونداری ءِ مونی دیک۔