دہشتگردی نا توننگ کن پاکستان تون شریداری ءِ سوگو کینہ، امریکہ

اسلام آباد، واشنگٹن :  وزیر خارجہ بلاول بھٹو زرداری و امریکی وزیر خارجہ انتونی بلنکن ٹیل فون آرابطہ کرینو‘ ہراٹی ہڑتوم آ راہشونک چندی امور تیا گپ وتران کریر‘ہڑتوم آوزیر خارجہ غاک تعلقداری‘ امن وسلامتی و شونداری کن رابطہ غاتے برجا تخنگ آ امنا کریر۔ بلاول بھٹو زرداری تون انتونی بلنکن نا گپ وتران آ ترجمان امریکی محکمہ خارجہ میتھیو ملر بیان جاری کرے ہراٹی پاننگا کہ امریکی وزیر خارجہ پاکستانی الس تون سوگو امریکی کمٹ منٹ ناعزم کرے‘ پاکستان نا اقتصادی شونداری امریکہ نا اولیت آتے ٹی اوار ءِ‘ امریکی وزیر خارجہ انتونی بلنکن باور کرفے کہ تکنیکی و شونداری گام گیج آتتون اوار پاکستان تون پد ریسہ رابطہ ٹی مرینہ‘او پارے کہ پاکستان تون پبی واپاری و زرکاری نا بابت تعلقداری تے شون ایتنہ‘ آئی ایم ایف تون پاکستان نا داسہ نا معاہدہ ستا کڑزک و پاکستان نا زرگزرانی بحالی کن اصلاحات اٹ سپورٹ کینہ‘ جمہوری اصول وکانود نا حکمرانی ءِ پاک امریکہ تعلقداری تے ٹی بنجائی اہمیت دوئی ءِ‘ امریکی وزیرخارجہ امنا کرے کہ پاکستان الس دہشت گردی آن بھاز زہمی مسنے‘ دہشت گردی تور کن پاکستان تون پد ریسہ شریداری ءِ سوگو کینہ۔ ترجمان نا رد اٹ ٹیل فون ہیت وگپ اٹ روس یوکرین جنگ و اوغانستان نا حالیت آتیا ہم گپ وتران کننگا۔ پاکستانی ترجمان دفتر خارجہ ناکنڈآن بیان اٹ پاننگانے کہ امریکی سیکرٹری خارجہ وزیر خارجہ بلاول بھٹو زرداری آ فون کرینے‘ ہڑتوم آکنڈآن پاک امریکہ تعلقداری تا ساڑی مثبت ترندی آ است جمانی نا درشانی ءِ کرے‘ وزیر خارجہ دا ہیت آ زور شاغا کہ پاکستان امریکہ تون تینا سوگو آ تعلقداری تا قدر ءِ کیک۔ امریکی سیکرٹری خارجہ پارے کہ ننا ملک پاکستان تون دا شریداری ءِ پین سوگو کننگ نا خواہندار ءِ۔ امریکی سیکرٹری خارجہ پارے کہ اسہ سال اسے ٹی شش مذاکرات تون اوار بڑزکو کہولی دورہ غاک تعقلداریک تے پین سوگو کرینو‘ وزیر خارجہ بلاول بھٹو زرداری اقتصادی وواپاری تعلقداری تتون گنڈوک اولیت و موسمیاتی بدلی و سوز توانائی ٹی کمک کننگ آ پاکستان نا خصوصی استخواہی آ زور شاغا۔ امریکہ نا مخ تفی کننگ آ منت ءِ ہرفسا وزیرخارجہ پارے کہ پاکستان و آئی ایم ایف نا نیام اٹ اسٹینڈ بائی ارینجمنٹ پاکستان نا اقتصادی وشونداری گرج آتے پورو کیک۔ وزیر خارجہ بلاول بھٹو زرداری پارے کہ پاکستان تینا زرگزرانی ٹی بنچر اصلاحات اتنگ کن پرعزم ءِ۔ ہڑتوم آ وزیرخارجہ غاک ڈیہہ اٹ امن‘ سلامتی و شونداری ءِ ودفنگ کن پاکستان وامریکہ نا نیام اٹ رابطہ غاتا اہمیت آ زور شاغار۔ او دہشت گردی نا گڑتی تون اوار علاقائی سلامتی نا حالیت آ ہم گپ وتران کریر۔ اوغانستان اٹ امن وسوگوی کن کمک ءِ برجا تخنگ نا استخواہی تا درشانی ءِ کریر۔

(آن لائن)