پارلیمنٹ نا اسیجائی دیوان اٹی الیکشن ایکٹ ترمیمی بل ءِ پد بٹنگا
حکومت و تحریک انصاف نا باسک آتا نیام اٹ جھیڑہ، شہادت نا کانود تون اوار بھاز آ بل آک پارلیمنٹ آن منظور
اسلام آباد : اسپیکر قومی اسمبلی حکومت و اپوزیشن باسک آتا اعتراض کننگ آ پارلیمنٹ نا اسیجائی دیوان اٹ الیکشن ایکٹ ترمیمی بل ءِ بد بٹے‘ سیوتیک پیدوار کریر کہ نگران حکومت ءِ آخبتی و گچین مروک حکومت ناواکداری تے تننگ نا پبی مخالفت ءِ کننگک‘ دیوان اٹ حکومت و تحریک انصاف نا باسک آتا نیام اٹ بھاز جھیڑہ مس‘ ولے شہادت نا کانود تون اوار بھاز آ بل آتا پارلیمنٹ منظوری ءِ تس۔ اسپیکر پارے کہ ایوان اٹ جوان انگا چاگڑد جوان کانود جوڑ کننگ کن المی ءِ‘ سَے شنبے نادے پارلیمنٹ نا اسیجائی دیوان اسپیکر راجہ پرویز اشرف ناکماشی ٹی یک ونیم گھنٹہ ہُرے آبنا کرے‘ دیوان نا بنا مس تو سینیٹرمیاں رضاربانی اعتراض کرسا پارے کہ اینو نا ایجنڈا ٹی بے قاعدگی تا نشاندہی ءِ کننگ خواوہ ایجنڈا ٹی بیست وپنچ ٹک ءُ‘ اہم ءُ بل و کیہی بل آتے ٹی ترمیم تا سلاہ تننگانے و شاید سپلیمنٹری ایجنڈا اس ہم ارے‘ بل اکن تو ایجنڈا سہی ءِ ولے ترمیم کن باسک آتے ہمو ترمیم تے تننگ المی ءِ ہرا داسکان تننگ تنو‘ رول آتا رد اٹ باسک آتے اسہ دے اس مست ترمیم ءِ اصل بل اتون اوار تننگ المی ءِ‘ اوپارے کہ اگہ اسیجائی دیوان ءِ نم قومی اسمبلی و سینیٹ آنبار ربڑ اسٹیمپ جوڑ کننگ خوارے تو نما مرضی ءِ‘ نم دانا موکل ءِ تفبہ‘ نی دا گیم انا بشخ مفہ ہراٹی پارلیمنٹ ءِ بلڈوز کننگے‘ ای دا وڑ انا ترمیم اٹ اوار افٹ ہرا عدلیہ نا فیصلہ غاتیان چَپ ءِ۔ سینیٹر مشتاق احمد خان پارے کہ ایجنڈا ٹی گچین کاری اصلاحات ہم اوار ءِ ہرانا ترمیم نا ننے سما اف‘ داڑا نن امر منظوری ناعمل ءِ مونی دننگ کینہ‘ پارلیمنٹ ءِ انگوٹھا چھاپ جوڑ کننگپ‘ پارلیمنٹ ورول آتے شرف تننگے‘ دا وڑ اٹ بے آب ءُ کانود جوڑ کننگ تو مریک ولے السی آسودہی کن آخا۔ اینو کانود جوڑ کننگپ۔ سینیٹر علی ظفر پارے کہ است ہسونی نا ہیت دادے کہ کانود جوڑ کننگ انگ ءِ‘ نے آن خواست ءِ کہ آئین وکانود نا رد اٹ فیصلہ کرفو‘ بھاز آک سرپند مننگ تو پین ہیت اسے کہ کانود ءِ ہم خنتنو‘ ہرافک خواننگ خوارہ اوفتے ہم وارخواہی تننگتو‘ کانود تو پاس مریک ولے دا کانود نا اہمیت انت سلک‘ الس نا مون آپاننگک امنا کننگک کہ ریاست نا مسہ تمبہ ءُ پارلیمنٹ اہم ووتواجہہ ءِ‘ اگہ اسہ تمبہ اس کاریم کپ توریاست کاریم کننگ کپک‘ دا ہمو ادارہ ءِ ہرانا نی کماشی ءِ کننگ اٹی اُس۔ دا وخت آ وزیر دفاع خواجہ آصف پارے کہ بداخلاق انگا نیاڑی تا حیا غا لیکچر جوان اف، دا ہموفک ءُ ہرا چیف آف آرمی سٹاف ءِ تینا باوہ کریسر۔
(آن لائن)