عمران خان الیکشن کمیشن و سائفر کیس اٹ ایف آئی اے ٹی پیش

اسلام آباد :  چیئرمین پی ٹی آئی الیکشن کمیشن اٹ پیش مس‘،پی ٹی آئی چیئرمین نا وکیل ریکارڈ مفننگ آ وارخواہی خواہس‘ الیکشن کمیشن سماعت ءِ 2اگست اسکان پد بٹے۔ الیکشن کمیشن نا کنڈآن پی ٹی آئی نا چیئرمین عمران خان نا توہین الیکشن کمیشن کیس اٹ پیش مفننگ آ بے ضمانت دزگیری جاری کننگ آن پد پی ٹی آئی چیئرمین الیکشن کمیشن اٹ تینٹ پیش مس‘ کیس انا سماعت ءِ سندھ انا باسک نثار درانی ناکماشی ٹی چار باسکی کمیشن کرے‘ سماعت نا وخت آ پی ٹی آئی نا چیئرمین نا وکیل شعیب شاہین الیکشن کمیشن نا مون آپیش مس‘ داوخت آ ممبر الیکشن کمیشن پارے کہ اینو تو دا کیس اٹ ڈوہ بیٹ کروئی ءِ تو پی ٹی آئی نا وکیل شعیب شاہین پار ے کہ کن تون ریکارڈ اف وارخواہی تننگے‘ او پارے کہ دا کیس اٹ اینو اولیکو وار پیش مسونٹ‘ ممبر الیکشن کمیشن خیبر پختونخوا پارے کہ فائل و ریکارڈ ہلنگ نا زمواری ءِ‘ الیکشن کمیشن چیئرمین پی ٹی آئی نا وکیل نا خواست ءِ منظور کرے‘ دا وخت آ کمیشن چارج فریم کننگ کن چیئرمین پی ٹی آئی ءِ حاضری ءِ پک کننگ نا پرمان کرسا سماعت ءِ 2 اگست اسکان پد بٹے۔ داکان بیدس پاکستان تحریک انصاف نا چیئرمین و مسکوہی وزیراعظم سائفر کیس انا جاست پاست کن بنجائی جاست پاستی ایجنسی نا جوائنٹ انکوائری ٹیم انا مون آ پیش مس‘ چیئرمین پی ٹی آئی اِرا گھنٹہ ہُرے آ ہیڈ کوارٹر آ سرمس‘ جاست پاست اٹ سائفر آڈیو لیک سوج آتے کننگا۔ چیئرمین پی ٹی آئی سائفرکیس اٹ ایف آئی اے نا اسیجائی جاست پاستی ٹیم انا مون آ پیش مس‘ او ایف آئی اے ہیڈ کوارٹر اٹ اِرا گھنٹہ اسکان ساڑی ئس۔ چیئرمین پی ٹی آئی آن سائفرکیس اٹ ایف آئی اے نا اسیجائی انکوائری ٹیم پرسجو کرے‘ جاست پاستی ٹیم عمران خان آن چندی سوج آتے کرے۔چیئرمین پی ٹی آئی آن سائفر آ آڈیو لیک و پرنسپل سیکرٹری عظم خان نا بیان نا بابت ہم سوج کننگا‘ انکوائری ٹیم انا جاست پاست آن پد او ایف آئی اے ہیڈکوارٹر آن پدی ہنا‘ یات سلے کہ تدوک آ دے مسکوہی وزیراعظم نا مسکوہی پرنسپل سیکرٹری اعظم خان نا بیان آن پد ایف آئی اے سائفر جاست پاست کن عمران خان، شاہ محمود و اسد عمر ءِ بٹنگاسس۔ اعظم خان تینا بیان اٹ پاریسس کہ سائفر سیاسی مسخت کن پری پلان راگ اس ئس۔

(آن لائن)