جہانی دین انا توننگ نا اسٹ انگا کسر تین پہ تینی کمک ءِ، شاہ محمود قریشی

اسلام آباد(اے پی پی) وزیر خارجہ مخدوم شاہ محمود قریشی فرانس نا وزیر خارجہ جان ایولیودریان ءِ ٹیل فون کرینے، او تینا فرانسیسی ہم منصب تون کورونا وائرس نا ودوک آ تالانی ءِ توننگ و دا جہانی آفت تون مون تننگ کن کمکاری نا بابت سرجم گپ و تران کریر۔ وزیر خارجہ شاہ محمود قریشی اوڑتون کورونا وائرس نا سوب فرانس اٹی مروک آ جانی نسخان آ ڈکھ و است ہسونی نا درشانی ءِ ہم کرے۔ وزیر خارجہ فرانس اٹی رہینگوک کورونا وائرس آن زہمی 13پاکستانی تے وخت آ طبی کمک فراوان کننگ و اوفتا خیال داری ءِ کننگ آ فرانسیسی وزیر خارجہ نا منت واری ءِ ہرفے۔ وزیر خارجہ پارے کہ پاکستان اٹی کورونا وائرس آن زہمی تا کچ اٹی ودکی مننگ ءِ، ننے دا جہانی دین اتون مون تننگ کن اسیجا کوشست آتے کاریم اٹ اتوئی مریک۔ فرانس کورونا وائرس نا مون ءِ توننگ نا بابت ہراگام گیج آتے کرے اوستاکڑزرہ۔ وزیر خارجہ فرانس اٹی مبینہ وڑاٹ کورونا دین آن زہمی پاکستانی شاری تا خاص خیال ءِ تخنگ آ فرانسیسی وزیر خارجہ نا منت واری ءِ ہرفے۔ وزیر خارجہ دا جہانی دین اتون مون تننگ کن پاکستان نا کنڈآن چست کروک آ گام گیج آتیان ہم تینا فرانسیسی ہم منصب ءِ معلومدار کرے۔ کورونا دین انا تالان مننگ نا سوب آن ایران نا حالیت آک بے کچ نازرک ءُ، ہزار آ بندغ آک دا وائرس نا گواچی مسنو، و ایرانی حکومت ، زرگزرانی پابندی تا سوب، دا گھمبیر حالیت آتا مون ءِ توننگ نا متحمل مننگ کپک۔ وزیر خارجہ پارے کہ ایران اٹی ترندی اٹ تالان مروک آ دا دین ءِ اگہ توننگتو تو مچ آ ڈیہہ آ دانا منفی زہم آک تمرہ۔ گرج دا ہیت انا ءِ کہ انسانی ہمدردی نا رداٹ ایران آ خلوک زرگزرانی پابندی تے دمدستی وڑاٹ اسہ کنڈ کننگے تانکہ او تینا وسیلہ غاتے دا جہانی دین اتون مون تننگ کن کاریم اٹ اتنگ کے۔ وزیر خارجہ دا جہانی دین انا رداٹ تدوک آ ہشت تُوآن بھارت نا کنڈآن مقبوضہ جموں و کشمیر اٹی برجا پدریسہ کرفیو و اوٹی خور و دوائی تا کاختی نا گواچی 8ملین کشمیری تا تشویشناک حالیت آتیان ہم تینا فرانسیسی ہم منصب ءِ معلومدار کرے۔ اوپارے کہ مقبوضہ جموں و کشمیر نا کرفیو زدہ علاقہ ٹی کورونا وائرس نا تالان مننگ نا حوال بننگ ءِ، جہانی برادری ءِ کودک کشمیری تا زند ءِ مون تروک خطرہ غاتے مون آ تخسا تینا کڑد ءِ ادا کروئی مریک۔ کورونا جہانی دین انا تالان مننگ آن نزور زرگزران نا حامل شون پذیر ملک آتے زرگزرانی مشکل آتا مون تروک ءِ، برآمد و زرمبادلہ بھلو حد اسسکان کم مننگ نا اندیشہ ءِ، دا رداٹ وزیراعظم عمران خان وام تا بھاریم نا کیرغ شون پذیر ملک آتے وام تا ادائیگی ٹی آسراتی تننگ نا خواست ءِ کرینے، تانکہ شون پذیر ملک آک تینا کچ اٹنگا وسیلہ غاتے دا جہانی چیلنج اتون مون تننگ کن کاریم اٹ اتنگ کیر۔ فرانسیسی وزیر خارجہ ایران آ خلوک پابندی تا معاملہ آئی ایم ایف و شون پذیر ملک آتے مون تروک زرگزرانی ویل آتا ایسر جی 20اتون ہرفنگ نا عندیہ تس۔ وزیر خارجہ ساڑی ایمرجنسی حالیت آتا رداٹ 26مارچ آ فرانس و پاکستان نا نیام اٹ پک مروک ہڑتوم آ کنڈآتا دیوان ءِ ویڈیو لنک انا کمک اٹ اڈتننگ نا سلاہ تس۔ فرانس نا وزیر خارجہ جان ایولودریان دا مشکل ساہت اٹی فرانس تون یکجہتی نا درشانی ءِ کننگ آ وزیر خارجہ مخدوم شاہ محمود قریشی نا منت واری ءِ ہرفے۔ ہڑتوم آ وزیر خارجہ غاتا دا جہانی چیلنج تون مون تننگ و تین پہ تینی کمکاری ءِ مون آ دننگ کن سلابتی چرجوئی ءِ برجاتخنگ نا فیصلہ ءِ کریر۔