بلوچستان نا شونداری ءِ بنجائی حکومت اولیت ایتک، وزیراعظم

اسلام آباد: وزیراعظم محمد شہباز شریف پارینے کہ بلوچستان نا شونداری ءِ بنجائی حکومت اولیت ایتک، وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم وزیر مملکت پاور ڈویژن ہاشم نوتیزئی تون گپ وتران کرسا کرے ہرا جمعہ نادے آ داڑے اوڑتون اوڑدہی کرے۔ اوڑدہی ٹی وزیراعظم پارے کہ بلوچستان نا شونداری ءِ بنجائی حکومت اولیت ایتک، دا وار نا ننا حکومت خاص وڑ اٹ صوبہ نا ویل آتا ایسری و شونداری آ چکار کرینے، اوڑدہی ٹی پاور ڈویژن نا امور آ گپ وتران و ملک انا جم سیاسی حالیت آتیا گپ وتران کننگا۔ اوڑدہی ٹی بلوچستان نیشنل پارٹی آن تعلق تخوک ملک عبدالولی کاکڑ ہم ساڑی ئس۔ داکان بیدس وزیراعظم محمد شہباز شریف تون چندی سیاسی راہشونک جتا جتا اوڑدہی کریر۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم تون قومی اسمبلی نا باسک چوہدری احسان الحق باجوہ، مسکوہی صوبائی اسمبلی نا باسک صوفی اکرم و زاہد اکرم اوڑدہی کرے۔ اوڑدہی ٹی تعلقدار حلقہ نا ویل و سیاسی حالیت آتیا گپ وتران کریر۔ وزیراعظم تون پاکستان مسلم لیگ (ن) بلوچستان نا صدر جعفر خان مندوخیل و مسکوہی وزیراعلیٰ گلگت بلتستان حافظ حفیظ الرحمان ہم جتا جتا اوردہی کریر۔ جعفر خان مندوخیل اوڑدہی ٹی صوبہ بلوچستان اٹی وزیراعظم نا پارت آ بناکروک شونداری کاریم تیا پیش رفت و اونابابت مثبت السی ردعمل آ گپ وتران کریر وخت اس کہ مسکوہی وزیراعلیٰ گلگت بلتستان حافظ حفیظ الرحمان اوڑدہی ٹی گلگت بلتستان نا سیاسی حالیت آتیا وزیراعظم تون سرجم گپ وتران کرے۔

(اے پی پی)