پی ڈی ایم نا 2 جج آ اعتراض، فل کورٹ نا خواست
صوبہ غاتیٹی گچین کاری نا کیس، حکومتی سیوت اعجازالاحسن، جسٹس مظاہر نقوی آ اعتراض کرے، خواست کینہ کہ کل آ نوٹس راہی کننگے، اعتراض خلنگوک جج آک بایدے بنچ اٹ تولپس، فاروق ایچ نائیک
Get real time updates directly on you device, subscribe now.
اسلام آباد : سپریم کورٹ اٹ پنجاب و خیبرپختونخوا ٹی گچین کاری تا تاریخ ءِ پک کننگ نا بابت ازخود نوٹس کیس اٹ حکومتی سیوت اٹ اوار جماعت آک 2 جج انا بنچ اٹ اوار مننگ آ اعتراض کریر۔ صوبہ پنجاب و خیبر پختونخوا (کے پی) ٹی لس گچین کاری تا باندات آ سپریم کورٹ نا کنڈآن ہلوک ازخود نوٹس نا سماعت مس تو پیپلز پارٹی نا وکیل فاروق ایچ نائیک ناکنڈآن بنچ اٹ اوار اِرا جج آ اعتراض کننگا۔ چیف جسٹس عمر عطا بندیال ریمارکس تس کہ ازخود نوٹس ہلنگ کنا واکداری دنگ اٹ ارے۔ جسٹس اطہر من اللہ سلاہ تس کہ بنچ اٹ اوار شرفمند جج آتیا اعتراض کننگ آن پد باندات نا سماعت کن بایدے فل کورٹ بنچ ٹہیفنگے۔ جمعہ نا دے عدالت عظمی ٹی از خود نوٹس کیس انا سماعت ءِ چیف جسٹس آف پاکستان جسٹس عمر عطا بندیال ناکماشی ٹی 9باسکی لارجر بنچ کرے۔ بنچ انا ایلو باسک آتے ٹی جسٹس اعجاز الاحسن، جسٹس منصورعلی شاہ، جسٹس منیب اختر، جسٹس یحییٰ آفریدی، جسٹس مظاہرعلی اکبر نقوی، جسٹس جمال مندوخیل، جسٹس محمد علی مظہر و جسٹس اطہرمن اللہ اوار ءُ۔ جمعہ نا دے سماعت نا بنا ٹی پاکستان مسلم لیگ نواز (ن) نا وکیل منصور اعوان عدالت ءِ پارے کہ پرمان نا کاپی داسکان رسینگ تنے‘ چیف جسٹس پارے کہ اینو کل انا مچ مننگ نا مسخت دا ئس کہ کل ءِ سما مرے‘ کل پڑک آتا وکیل تے عدالت اٹ خننگ آن خوش مسٹ۔ دا وخت آ پاکستان پیپلز پارٹی نا وکیل فاروق ایچ نائیک بنچ آ اعتراض کرسا پارے کہ ننے ہم نوٹس رسینگ تنے‘ خواست کینہ کہ کل ءِ نوٹس جاری کننگے‘ ننے بنچ اٹ اوار 2 جج جسٹس اعجازالاحسن و جسٹس مظاہر نقوی آ اعتراض ارے‘ ہڑتوم آ جج آک بایدے بنچ اٹ تولپس۔ دا وخت آ جمعیت علمائے اسلام ف، مسلم لیگ نواز و پاکستان بار کونسل نا کنڈآن 2 جج آ اعتراض کننگا۔ چیف جسٹس آف پاکستان فاروق ایچ نائیک ءِ پارے کہ اینو اول اٹ کل انا حاضری ءِ خلینہ‘ دوشنبے نا دے کل ءِ خف تورنہ‘ سپریم کورٹ بار پین وکیل اسے نا کمک اٹ عدالت اٹ تینا نمائندگی ءِ کے۔ صدر نا کنڈآن اونا سیکرٹری عدالت اٹ پیش مننگ اٹی ءِ‘ ہندن لگک کہ نن کل سیاسی جماعت آتے نوٹس جاری کرین‘ کل ساڑی ءُ‘ عدالت اٹ گورنر پنجاب نا وکیل مصطفیٰ رمدے پیش مسنے۔ کمرہ عدالت اٹ سماعت نا وخت آ فاروق نائیک ن لیگ، پیپلزپارٹی و جے یو آئی نا اسیجائی بیان ءِ عدالت اٹ خوانا۔ فاروق ایچ نائیک ہیت کرسا پارے کہ جسٹس جمال مندوخیل نا نوٹ آن پد جسٹس اعجاز، جسٹس مظاہر بنچ آن جتا مریر، کمرہ عدالت اٹ اسیجائی بیان ءِ خوانسا پی پی نا وکیل پارے کہ ہڑتوم آ جج آک ن لیگ و جے یو آئی نا ہچ ءُ مقدمہ سے نا سماعت ءِ کپس‘ ہڑتوم آ جج آتا پاننگ آ ازخود نوٹس ہلنگا‘ ہندا سوب آن ہڑتوم آک بنچ آن جتا مریر۔ فیئر ٹرائل نا حق انا رد اٹ جسٹس اعجاز و جسٹس مظاہر بنچ آن جتا مریر۔
(آن لائن)