روس فوجی تے پدی دے،اقوام متحدہ ٹی یوکرائن آ قرارداد منظور

نیویارک: اقوام متحدہ نا جنرل اسمبلی یوکرائن اٹی جنگ ءِ چٹفنگ نا پارینے و روس آن خواست کرینے کہ او اقوام متحدہ نا چارٹر نا رداٹ دمدستی وڑاٹ تینا فوج ءِ یوکرائن آن پدی بٹنگے۔ یوکرائن آ روس انا فوجی جلہو ءِ اِرٹمیکو سال بناکننگ آن منہ گھنٹہ مست جہانی ادارہ تینا یانزدہ می خصوصی ہلہلہ ئی دیوان اٹی اسہ پوسکن ءُ قرارداد اس منظور کرینے ہراٹی جنگ ءِ چٹفنگ کن پاننگانے۔ جنرل اسمبلی نا 141 باسک ملک آک دا قرارداد نا حق اٹی وخت اس کہ ہفت ملک آک دانا برخلاف وونٹ تسر ہرافتے ٹی بیلارس، جمہوریہ کوریا، اریٹریا، مالی، نکاراگوا، روس وشام اوار ءُ۔ چین، بھارت و پاکستان تون اوار 32 ملک آک سلاہ درشانی ٹی بشخ ہلتوس۔ 11 پیراگراف آ تالان قرارداد اٹی جنرل اسمبلی دا خواست انا درشانی ءِ کرے کہ روس’دمدستی‘ پورو و بے شڑت تینا فوج ءِ یوکرائن نا علاقہ غان پدی بٹنگے و مخاصمت ءِ چٹفنگے۔ دا قرارداد نا کمک اٹ اسمبلی باسک ملک آتیا زور شاغا کہ او غذائی رکھ، توانائی، مالیات، چاگڑد و جوہری سلامتی و رکھ آ دا جنگ انا جہانی اثرآتون مون تننگ کن یکجہتی نا جوزہ نا رداٹ کمک کیر۔ پائیدار امن نا بست وبند کن دا راستکی تے مون آ تخنگ آ زور شاغسا اسمبلی غٹ ملک آتے داہم پارے کہ او دا اثرآتون مون تننگ کن سیکرٹری جنرل نا کوشست آتیٹی کمک کیر۔ دیوان نا بناٹی دا قرارداد آ شرہ مس ہراٹی جنر ل اسمبلی نا صدر سابا کوروشی نا پاننگ ئسک کہ مچ آ سال اسمبلی نا 193 باسک، سیکرٹری جنرل و جہانی برادری د اجنگ ءِ چٹفنگ و اقوام متحدہ نا چارٹر و جہانی کانود نا پاسداری ءِ کننگ نا پدریسہ و پاش آن پاش خواست ءِ کرسا کرینے۔ اسمبلی یوکرائن نا جہانی وڑاٹ امنا مروک سیم وسمندری دنگ اٹ اونا وتواجہی، آجوئی، سیوت و علاقائی سالمیت تون تینا تعلقداری ءِ دُوارہ پک ہم کرے۔ قرارداد اٹی داپک کننگ نا گرج آہم زور شاغنگا کہ جہانی کانود نا رداٹ یوکرائن اٹی بھاز سنگین ڈوہ آتا ذیل اٹی بروک آ گام گیج آتا آجوقومی یا جہانی جاست وپاست و کانودی کارروائی ءِ پک کننگے تانکہ غٹ زہمی تے انصاف ملے و آخبت اٹ داوڑنا ڈوہ تا توننگ ممکن مننگ کے۔ پنچ شنبے نادے آ جہانی ادارہ بیلارس نا کنڈ آن قرارداد اٹی سلاہ کروک آ اِرا ترمیم آتے مسترد ہم کرے۔ اولیکو سلاہ نا رداٹ قرارداد نا چندی شڑت آتے بدل کننگ ئسک و ارٹ میکو نا رداٹ اسمبلی ءِ باسک ملک آتیے پاننگ ئسک کہ او ایلو ہیت آتیان بیدس جنگ زدہ علاقہ غاتیٹی سلہہ گدریفنگ آن پاناد کیر۔

(اے پی پی)