کورونا دین انا 42 پوسکن ءُ کیس رپورٹ، 16 نا حالیت نازرک

اسلام آباد: قومی ادارہ جان جوڑی (این آئی ایچ) پارینے کہ مچ آ ملک اٹی 24 گھنٹہ ٹی کورونا دین انا 42 پوسکن ءُ کیس رپورٹ مس ہرافتے ٹی 16 ناجوڑ آتا حالیت نازرک ءِ۔ جمعہ نادے آ این آئی ایچ نا کنڈ آن برجا حساب وکتاب نا رداٹ مچ آ ملک اٹی 24 گھنٹہ ٹی 5 ہزار 985کورونا ٹیسٹ کننگا ہرافتیان 42 بندغ آتا ٹیسٹ مثبت بس، ہندا وڑ دا مد اٹی کورونا ٹیسٹ انا مثبت کچ 0.70 درسد ئسک۔ داکان بیدس دا وخت آ کورونا دین آن اسہ ناجوڑ اس ہم زوال کتنے وخت اس کہ 16 ناجوڑ آتا حالیت نازرک ءِ۔ مچ آ ملک انا چندی شار تیٹی 24 گھنٹہ ٹی کروک آ ٹیسٹ آتیان اسلام آباد اٹی 142 ٹیسٹ کننگا ہرافتیان 05 ٹیسٹ مثبت بس و ہموڑے مثبت کیس آتا کچ 3.52 درسد ئسک۔ ہندا وڑ راولپنڈی ٹی 567 ٹیسٹ آتیان اسہ ٹیسٹ اس مثبت بس، ہموڑے کچ 0.18 درسد ئسک، سرگودھا ٹی کروک آ 138 ٹیسٹ آتیان 02 ٹیسٹ مثبت بس و ہموڑے کچ 1.45 درسد ئسک وخت اس کہ لاہور اٹی اسہ ہزار 654 ٹیسٹ آتیان 25 ٹیسٹ مثبت بس و ہموڑے مثبت کیس آتا کچ 1.51 درسد ئسک۔

(اے پی پی)