بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز (BUITEMS) اٹی فوٹوگرافی، خاکہ نگاری و پینٹنگ نا گو و نمائش اڈ تننگ

کوئٹہ، بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز (BUITEMS) اٹی فوٹوگرافی، خاکہ نگاری و پینٹنگ نا گو و نمائش اڈ تننگا‘ ہرانا مسخت فنونِ لطیفہ نا بھرمی و تخلیقی وڑ تا کمک اٹ بلوچستان اٹی دیر انا بست وبند‘ کشار، لائیو اسٹاک و رینج لینڈ تون تعلقدار السی شعور و آگاہی ءِ شون تننگ ءِ۔ دا دود “آگاہی ودفنگ و نالج مینجمنٹ پروجیکٹ” نا رد اٹ اڈہلک‘ ہرادے یورپی یونین (EU) ریوائیول آف بلوچستان واٹر ریسورسز پروگرام (RBWRP) نا رد اٹ مالی کمک فراوان کرینے،وخت اس کہ پروجیکٹ آ BUITEMS اقوامِ متحدہ نا ادارہ کنشت و کشار وکشار پاکستان نا کمکاری اٹ عملدرآمد کرے۔ دود اٹی وائس چانسلر بیوٹمز پروفیسر ڈاکٹر حفیظ خالد، پرو وائس چانسلر میر وائس کاسی، رجسٹرار بیوٹمز جمال مصطفی، ڈائریکٹر کمیونیکیشن سید دارا شکوہ امیر، ڈائریکٹر آئی سی آر ایم ایس اینڈ کوالٹی ڈاکٹر زاہد رؤف و ٹیم لیڈ پروفیسر ڈاکٹر جان محمد تون اوار یونیورسٹی نا استاد، طالب علم و ایلو تعلقدار بندغ آک بشخ ہلکر۔ نمائش اٹی طالب علم و ورنا آرٹسٹ آتا کنڈآن بلوچستان نا جتا جغرافیاائی، ماحولیاتی و کشاری حالیت آتے سرحال جوڑ کرسا فوٹو‘ خاکہ و پینٹنگ پیش کننگا۔ فن پارہ تا کمک اٹ صوبہ ٹی دیر انا اہمیت، کچ اٹنگا آبی وسیلہ، دیر انا بھرمی و زموارانہ کاریم اٹ اتنگ، کشاری سرجز، لائیو اسٹاک، قدرتی کاپچر و چاگڑد نا رکھ کون آ اہم سرحال آتے پیدوار کننگا۔ دا وخت آ ترانکار آک پاریر کہ بلوچستان اٹی دیر اسہ بھلو قدرتی وسیلہ اسے‘ صوبہ نا کشار، لائیو اسٹاک، زرگزران و ماحولیاتی بریبری نا دراست سیبو دیر انا بھرمی بست وبند وساڑی مننگ آٹے۔ او پاریر کہ دیر انا کچ اٹنگا وسیلہ غاتا رکھ و اوفتا مدامگی کاریم اٹ اتنگ کن پوسکنوڑ علم، پٹ وپول‘ گچین ڈٹ بندی و السی آگاہی ءِ شون تننگ وخت انا اہم ءُ گرج اسے۔ او پاریر کہ ورنا نسل ءِ دیر انا رکھ، قدرتی وسیلہ غاتا زمواری اٹ کاریم اٹ اتنگ و چاگڑد دوست گام گیج آتا بابت معلومدار کننگ آخبت نا مدامگی شون اکن المی ءِ۔