روڈ آتا شونداری ڈٹ آتا وخت آ پوروی آن الس ءِ بھاز فائدہ مریک،صلاح الدین نورزئی

نصیرآباد، کمشنر نصیرآباد ڈویژن صلاح الدین نورزئی پارینے کہ وزیراعلیٰ بلوچستان میر سرفراز بگٹی و چیف سیکرٹری بلوچستان شکیل قادر خان نا پارت آتا رد اٹ نصیرآباد ڈویژن اٹی روڈ آتا شونداری ڈٹ آتے پی سی ون نا رِد اٹ پورو کننگ کن ڈویژنل انتظامیہ کل دوئی وسیلہ غاتے کاریم اٹ اتیک‘ محکمہ مواصلات و تعمیرات روڈ آتا انجینئر آتے پورو کمک فراوان کرسا السی فائدہ کن برجا شونداری ڈٹ آتے پن کروک وخت آ پورو کرفک تاکہ الس ءِ حکومت نا دا گام گیج آتیان فائدہ مننگ کے‘ دا خیال آتا درشانی ءِ او مواصلات و تعمیرات روڈ آتا شونداری ڈٹ و مون تروک ویل آتا جاچ انا بابت اڈ ہلوک دیوان نا کماشی ءِ کرسا کرے۔ دیوان اٹی سپرنٹنڈنگ انجینئر فدا حسین کھوسہ، ارسلا رند، پروجیکٹ ڈائریکٹر صحبت پور کشمور روڈ ظفر کھوسہ، ایگزیکٹو انجینئر عبدالستار بنگلزئی، بوستان خان چانڈیو، مجیب الرحمن ہاشمی، غلام دستگیر زہری، سب ڈویژنل افسر نادر علی پہنور، بشیر شاہ تون اوار ایلو تعلقدار افسر آک ساڑی ئسر۔ دیوان اٹ کل افسر آک تینا تینا ضلع غاتیٹی برجا شونداری ڈٹ‘ پیشرفت و مون تروک ویل آتا بابت کمشنر ءِ جم بریفنگ تسر۔ دا وخت آ کمشنر صلاح الدین نورزئی پارت کرے کہ ہرا ڈٹ آتا کاریم پوروی نا ریسہ ٹی ءِ اوفتے پین ہُرے مننگ آن مست پورو کننگے وشونداری ڈٹ آتے ہچ وڑ اٹ سست مننگ کن النگپ۔ او پارے کہ روڈ آتا شونداری ڈٹ آتا وخت آ پوروی آن الس ءِ بھاز فائدہ مریک‘ و داڑتون محکمہ نا کارکڑد و شرف ہم گنڈوک ءِ‘ دیوان نا مسخت کل برجا ڈٹ آتا جاچ ءِ ہلسا مون تروک اڑاند و ویل آتے وخت آ چٹفنگ ءِ پک کننگ ءِ‘ او کل افسر آتے پارت کرے کہ شونداری ڈٹ آتا فنڈ اتون اوار ایلو ویل آتا بابت بڑزکو کمامدار آتے باقاعدگی اٹ نوشت اٹ معلومدار کرینن تاکہ وخت آ گام گیج کرسا ڈٹ آتا پوروی ٹی مروک اڑاند آتے ایسر کننگ مرے۔