پامدارقومک تینا ربیدہ ئی میرات نا رکھ ءِ کیرہ،نسیم الرحمن خان ملاخیل

کوئٹہ، صوبائی سلاہکار چاگڑد و موسمیاتی تبدیلی نسیم الرحمن خان ملاخیل پشتون کلچرل ڈے انا وخت آ تینا کلہو اٹی مچ آ پشتون راج ءِ مبارکبادی و نیک استخواہی تا درشانی کرسا پارینے کہ زندہ و باشعور قوم آک ربیدگی و روایتی اقدار و تاریخی میراث نا رکھ ءِ کیرہ و دا دے ءِ اڈ تننگ نا اصل مسخت دا کل روایت، دود وربیدہ و زند ءِ گچین وڑ اٹ پہہ مننگ و اودے مدام زندہ تخنگ نا کوشست ءِ‘ او پارے کہ پشتون ربیدہ نا تینا اسہ رنگ اسے و اونا وڑ و ڈول آتیٹی مہر، ایلمی، انکساری و رواداری نا سبخ ملک‘ او پارے کہ پشتون ربیدہ، بہادری، غیرت، مہمان نوازی، پشتونوالی، امن پسندی، مہر و ایثار کون آ شانی تاریخ تون اوار ءِ‘ ننا ربیدہ مچ آ دنیا ٹی تینا اسہ جتا و نمان ءُ پجار اس تخک۔ صوبائی سلاہکار نسیم الرحمن خان پارے کہ ننا اینو نا ورناک بایدے تینا دود آتے زندہ تخر و اودے پوسکن آ چین تسکان گدریفر تاکہ مچ آ دنیا ٹی پشتون راج انا روایت و اخلاقی اقدار مثبت وڑ اٹ پیش کننگ مرے۔ او پارے کہ بلوچستان اٹی اخس کہ قومک رہینگرہ اوفتا تینا اسہ تاریخ اسے ہندا سوب آن ننے کل ءِ ملک و صوبہ نا تعمیر وشونداری کن تینا مثبت کڑد ءِ ادا کروئی تمکو، دا ملک ارے تو نن اُن، ننا پجار پاکستان آن ءِ۔ نسیم الرحمن ملاخیل پارے کہ ربیدہ اسہ تاریخی ریسہ اسے‘ ہرانا کمک اٹ ننا مستین و ساڑی حالیت آک گنڈوک ءُ ہرانا بنداو آ نن تینا آخبت نا کسر ءِ پک کینہ‘ او پارے کہ ارتقاء و شونداری نا سفر ہنسا مونی کاہک تو مستین نا کیہی گڑاک قصہ غانبار سلرہ و انسان پوسکن آ حالیت، گرج و خواست آتا رد اٹ پوسکنوڑ اقدار و گڑاتے ہرفک۔ او پارے کہ پشتون راج ایلمی، بشر دوستی نا سوگو و شانی اقدار و روایت آتا امین ءِ‘ ہندا سوب آن المی ءِ کہ پشتون کلچر نا دیوان تا کمک اٹ تینا سوچ و شانی اقدار ءِ زیات آن زیات مون آ اتنگے۔